ՀՀ քաղաքացիություն ստանալու համար դիմող ՌԴ քաղաքացիները հիմնականում ազգությամբ հայեր են․ Ղազարյան. ՏԵՍԱՆՅՈՒԹ

ՀՀ քաղաքացիություն ստանալու դիմումների թիվը 2025 թվականին գերազանցել է 32,000-ը, ինչը պատմական մաքսիմում է Հայաստանի Հանրապետության պատմության ընթացքում։ Այս մասին մամուլի ասուլիսի ընթացքում հայտարարել է ՆԳՆ փոխնախարար Արմեն Ղազարյանը։

Ըստ Ղազարյանի՝ Ուկրաինայում ռազմական գործողություններից և ՌԴ քաղաքացիների նկատմամբ ճամփորդական սահմանափակումներից հետո ՀՀ քաղաքացիություն ստանալու դիմումների կտրուկ աճ գրանցվեց։
«Եվ եթե հիմքերն էլ ուսումնասիրենք, կտեսնենք, որ այն Ռուսաստանի Դաշնության քաղաքացիները, ովքեր հիմնականում դիմում են Հայաստանի Հանրապետության քաղաքացիություն ստանալու, ազգությամբ հայեր են։

Այսինքն՝ սա հիմնականում այս տենդենցը առնչվում է մեր Սփյուռքին։ Այսինքն՝ ստացվում է, որ քաղաքացիությունը գործիքայնացվում է պարզապես ճամփորդական փաստաթուղթ ձեռք բերելու համար։ Որովհետև եթե նայենք, թե ազգությամբ հայերի համար քաղաքացիություն ձեռք բերելու ինչպիսի՞ պահանջներ ունի Հայաստանի Հանրապետությունը, այդ պահանջները զրոյական են։ Այսինքն՝ որևէ պահանջ չունի»,- ասաց Ղազարյան։

Արմեն Ղազարյանը նշել է, որ քաղաքացիության ինստիտուտի արժևորման նպատակով առաջիկայում կներկայացվեն օրենսդրական փոփոխություններ։ Բարձրաձայնվել է նաև այն խնդիրը, երբ անձը դադարեցնում է ՀՀ քաղաքացիությունը և կարճ ժամանակ անց նորից դիմում այն վերականգնելու համար։ Ըստ ՆԳՆ փոխնախարարի՝ այս դեպքն առանձնապես նկատելի է արական սեռի անչափահասների պարագայում։

Մանրամասները՝ տեսանյութում։

Անի Թամրազյան