Ուկրաինական ԱԹՍ-ները հարվածել են Նիժնեկամսկին․ թիրախը, հավանաբար, «Նիժնեկամսկնեֆտեխիմ» գործարանն է եղել

Ուկրաինական անօդաչու թռչող սարքերը հարձակվել են Թաթարստանի Նիժնեկամսկի վրա։ Supernova+ և Exilenova+ մոնիթորինգային ալիքների տվյալներով՝ հարձակումից հետո նավթավերամշակման գործարանի տարածքում հրդեհ է բռնկվել, գրում է Current time-ը։

Astra-ի հաղորդմամբ՝ թիրախը, հավանաբար, «Նիժնեկամսկնեֆտեխիմ»-ն է եղել, որը սինթետիկ կաուչուկների աշխարհի խոշորագույն արտադրողներից է։

«Նիժնեկամսկնեֆտեխիմ»-ից բացի՝ քաղաքի արդյունաբերական գոտում երկու նավթավերամշակման գործարաններ կան։

Նիժնեկամսկի քաղաքապետ Ռադմիր Բելյաևը հայտնել է, որ «Նիժնեկամսկի վրա զանգվածային օդային հարձակումը շարունակվում է»։

«Հարձակման են ենթարկվում ինչպես արդյունաբերական, այնպես էլ քաղաքացիական օբյեկտները։ Ցավոք, զոհեր կան»,- գրել է նա՝ զոհերի հստակ թիվ և հարձակման այլ մանրամասներ չհաղորդելով։

Շեբեկինսկի շրջանի Նովայա Տավոլժանկա գյուղում հարձակման հետևանքով զոհվել է տեղի բնակիչ, հայտնել է Բելգորոդի մարզի օպերատիվ շտաբը։ Անօդաչու թռչող սարքը հարվածել է մասնավոր տանը։

Ռուսաստանի կողմից նշանակված բռնակցված Սևաստոպոլի «ղեկավար» Միխայիլ Ռազվոժաևն էլ հայտնել է, որ Ինժիր լողափի մոտակայքում «անօդաչու թռչող սարքերի բեկորներն» անտառային հրդեհ են առաջացրել։ Փրկարարներն ու անտառտնտեսության աշխատակիցները տարհանում են մարդկանց Ինժիր լողափի ճամբարից։ Իրավիճակը վերահսկողության տակ է։ Անօդաչուի բեկորներից վնասվել է չորս մեքենա։

Exilenova+-ը նաև հայտնել է բռնակցված Դոնեցկի շրջանում հարձակման մասին։

«Պաշտպանության ուժերը ոչնչացնում են էներգետիկ ենթակառուցվածքները», – ասվում է հաղորդագրությունում։