Թրամփը հայտարարել է, որ ԱՄՆ-ը զինամթերքի «հսկայական պաշարներ» ունի՝ դրանց սպառվելու մասին հաղորդումների ֆոնին

Դոնալդ Թրամփը պնդել է, որ Միացյալ Նահանգները «հսկայական քանակությամբ» զինամթերք ունի։ ԱՄՆ նախագահի այս մեկնաբանությունը հետևում է տարբեր լրատվամիջոցների կողմից Պենտագոնի սպառված պաշարների մասին հրապարակումներին, գրում է CNN-ը։

«ԱՄՆ-ն ունի հսկայական քանակությամբ «զինամթերք», հատկապես՝ որոշակի տեսակների։ Բացի այդ, անհրաժեշտության դեպքում, մեծ քանակությամբ զինամթերք է արտադրվում և առաքվում ԱՄՆ»,- գրել է Թրամփը Truth Social-ում։

Նա չի նշել, թե ինչ զինամթերքի մասին է խոսքը։

«Պաշտպանական ընկերությունները մեր երկրի պատմության մեջ ամենամեծ թվով գործարաններն ու ֆաբրիկաներն են կառուցում։ Այս դավաճանական հայտարարությունները տարածողները  որոնվում են։ Նրանք կդատապարտվեն երկարատև ազատազրկման», սպառնացել է Դոնալդ Թրամփը։

Ավելի վաղ մի շարք լրատվամիջոցներ, այդ թվում՝ CNN-ը, հաղորդել էին, որ ԱՄՆ զինված ուժերը սպառել են THAAD հակահրթիռային պաշտպանության համակարգի որսիչ հրթիռների գրեթե 80%-ը։ Բացի այդ, մի շարք աղբյուրների փոխանցմամբ՝ ԱՄՆ բարձրաստիճան ռազմական հրամանատարները զգուշացրել են, որ Պենտագոնի զինամթերքի պաշարները «վտանգավոր չափով նվազել են»։

The Washington Post-ը, իր հերթին, հայտնում է, որ ԱՄՆ նախագահ Դոնալդ Թրամփը Պենտագոնի ղեկավար Փիթ Հեգսեթից բացատրություն է պահանջել Իրանի հետ պատերազմի ֆոնին զինամթերքի պակասի վերաբերյալ։ Աղբյուրների խոսքով՝ անցյալ շաբաթ Քեմփ Դեյվիդում կայացած կաբինետի նիստի ժամանակ Թրամփը խնդրել է Հեգսեթին բացատրել, թե ինչու է իրեն, ըստ երևույթին, մոլորեցրել զինամթերքի կրիտիկական պակասի վերաբերյալ, հավելելով, թե կարծում էր, որ պակասի հարցն արդեն լուծվել է։

Ի պատասխան՝ Պենտագոնի ղեկավարը պաշտպանվել է և փորձել պատասխանատվությունը տեղափոխել իր տեղակալ Սթիվեն Ֆեյնբերգի կողմը, հայտնել են աղբյուրները։

Սպիտակ տան մամուլի քարտուղար Քերոլայն Լիվիթը The Washington Post-ի աղբյուրների պատմությունները «կեղծ լուրեր» է անվանել։

«Սա բառացիորեն երբեք տեղի չի ունեցել։ Եվ նախագահ Թրամփը լիակատար վստահություն ունի Հեգսեթի նկատմամբ»,- հավելել է նա։

Պենտագոնը Թրամփի և Հեգսեթի միջև վեճի, ինչպես նաև ԱՄՆ-ում զինամթերքի պակասի մասին հաղորդագրությունները որակել է որպես «հորինված»։

Թարգմանությունը՝ Էմմա Չոբանյանի