Քաղաքականություն
04.08.2026 | 10:53
Ուկրաինական անօդաչու թռչող սարքերն օգոստոսի լույս 4-ի գիշերը հարձակվել են Մոսկվայի մարզի վրա։ Այս մասին հայտնել է նահանգապետ Անդրեյ Վորոբյովը։ Ըստ նրա՝ 5 մարդ զոհվել է, ևս 6-ը՝ վիրավորվել, գրում է Meduza-ն։
Վորոբյովը պարզաբանել է, որ հիմնական վնասը գրանցվել է Չեխով քաղաքային շրջանում։ Նովոսյոլկիի արդյունաբերական գոտում անօդաչուի հարվածը հրդեհներ է առաջացրել, որոնցից մեկը պահեստում է եղել։ Նա չի նշել, թե ինչ պահեստի մասին է խոսքը է, սակայն շեշտել է, որ հրդեհն արդեն մարվել է։
Բացի այդ, վնասվել է էլեկտրական ենթակայան և վարչական շենք։ Սոլնիշկովո գյուղում անօդաչու թռչող սարքերի բեկորները վնասել են մասնավոր տուն և մեքենա։ Տարածաշրջանում անօդաչու թռչող սարքերի հարձակումները շարունակվում են։
Astra-ն, հղում անելով ականատեսներին, հաղորդում է, որ անօդաչու թռչող սարքերը հարվածել են Չեխովի Wildberries-ի պահեստներին։ Այս մասին հայտնել է նաև ուկրաինական Exilenova+ տելեգրամյան ալիքը։
Լենինգրադի մարզը նույնպես անօդաչու թռչող սարքերի հարձակման է ենթարկվել, հայտնել է նահանգապետ Ալեքսանդր Դրոզդենկոն։ Նրա տեղեկացմամբ՝ «վնաս է գրանցվել Տոսնենսկի շրջանի Կրասնի Բոր գյուղի մոտ գտնվող պահեստային տարածքում»։ Մեկ մարդ վիրավորվել է։
Wildberries-ի մամուլի ծառայությունը հայտնել է Կրասնի Բորում լոգիստիկ օբյեկտի վրա հարձակման մասին։ Այնտեղ հրդեհ է բռնկվել։ Ընկերությունը պնդում է, որ տուժածներ չկան, օբյեկտում «նախազգուշական տարհանում» է իրականացվել։
Տվերի մարզի նահանգապետ Վիտալի Կորոլյովն ավելի ուշ հայտնել է, որ ԱԹՍ-ների հարձակումը հետ մղելիս «անօդաչու թռչող սարքի բեկորը» վնասել է Կալինինսկի շրջանի Էմմաուս գյուղում գտնվող Wildberries-ի պահեստի պատը: Նա հավելել է, որ պահեստի աշխատակիցները չեն տուժել:
ՌԴ ՊՆ-ն հայտնել է Բելգորոդի, Բրյանսկի, Վոլգոգրադի, Վորոնեժի, Կալուգայի, Կուրսկի, Լենինգրադի, Լիպեցկի, Նիժնի Նովգորոդի, Նովգորոդի, Օրյոլի, Պսկովի, Ռոստովի, Ռյազանի, Սմոլենսկի, Տվերի, Տուլայի մարզերի, Մոսկվայի մարզի և բռնակցված Ղրիմի վրա ուկրաինական 320 ԱԹՍ-ների խոցման մասին։
