Լեհաստանը պաշտոնապես հաստատել է, որ երկրի տարածքում ընկած հրթիռը ռուսական է

Լեհաստանի պաշտպանության փոխնախարար Ցեզարի Տոմչիկը հայտարարել է, որ երկրի տարածքում ընկած հրթիռը ռուսական X-101 է եղել։ Նրա խոսքերը մեջբերել է RMF24-ը, գրում Current time-ը։

Նրա խոսքով՝ հուլիսի լույս 30-ի գիշերը Լեհաստանի ուղղությամբ թռել է շուրջ 20 ռուսական հրթիռ։ Ուկրաինան խոցել է դրանք՝ բացի մեկից։ Վերջին հրթիռին հետևող Ուկրաինայի զինված ուժերի օդաչուն հետ է վերադարձել լեհական սահմանից 20 վայրկյան առաջ։ Տոմչիկը նշել է, որ նա չի կարողացել մտնել Լեհաստանի օդային տարածք՝ զինվորականների կողմից խոցվելու վտանգի պատճառով։ Այդ գիշեր Լեհաստանը կործանիչներ էր օդ բարձրացրել։

Ռուսական հրթիռը տեղական ժամանակով 3:40-ին հատել է Լեհաստանի օդային տարածքը և ընկել Լյուբլինի վոյևոդության Տարնավա Կոլոնիա գյուղի մոտ գտնվող դաշտում: Հաղորդվում էր, որ խառնարանի տրամագիծը մոտ 10 մետր է եղել։

Ուկրաինայի արտաքին գործերի նախարար Անդրեյ Սիբիհան անմիջապես հայտարարել էր, որ դա ռուսական X-101 թևավոր հրթիռ է: Ուկրաինայի ռազմաօդային ուժերի հրամանատարությունը հուլիսի 30-ի առավոտյան հայտնել է, որ Ռուսաստանն Ուկրաինայի ուղղությամբ արձակել է 61 X-101 թևավոր հրթիռ, որոնցից ուկրաինական զինվորականները խոցել են 54-ը։

Լեհաստանի վարչապետ Դոնալդ Տուսկը, մինչդեռ, զգուշավոր էր հայտարարություններում: Նախօրեին հրթիռի անկումից հետո Լյուբլինում կայացած հանդիպման ժամանակ նա հայտարարել էր, որ «առայժմ ամեն ինչ ցույց է տալիս», որ դա ռուսական հրթիռ է, բայց իշխանությունները կսպասեն հետաքննության արդյունքներին, ասվում է հրապարակման մեջ։

Թարգմանությունը՝ Էմմա Չոբանյանի