ԵՏՄ սկզբունքների չաշխատելը միայն Հայաստանի խնդիրը չէ, ողջ ԵՏՄ խնդիրն է. Պապոյան․ ՏԵՍԱՆՅՈՒԹ

ՀՀ էկոնոմիկայի նախարար Գևորգ Պապոյանն այսօր ՔՊ վարչության նիստից առաջ լրագրողների հետ ճեպազրույցի ժամանակ անդրադարձավ հայկական ապրանքների արտահանման ոլորտում առկա խնդիրներին և ԵՏՄ շրջանակներում Ռուսաստանի կողմից կիրառվող սահմանափակումներին։

Նախարարը շեշտեց, որ ԵՏՄ օրենսդրությամբ անդամ պետությունները պարտավոր են ապահովել ապրանքների, ծառայությունների և աշխատուժի ազատ տեղաշարժը։ Ըստ նրա՝ եթե այս սկզբունքը խաթարվում է, նշանակում է՝ կառույցի հիմնարար սկզբունքները չեն գործում։

«Մենք ուզում ենք, որ ԵՏՄ-ն աշխատի և գործի, այլ ոչ թե լինի ՀԱՊԿ-ի նման, որը չի աշխատում»,- հայտարարեց Պապոյանը՝ ընդգծելով Հայաստանի շահագրգռվածությունը կառույցի կայացման հարցում։

Անդրադառնալով հայկական արտադրանքի որակին և դրա նկատմամբ կիրառվող սահմանափակումներին՝ նախարարը շեշտեց. «Այն ապրանքը, որը վաճառվում է ԱՄԷ-ում, Եվրամիությունում և Չինաստանում, չի կարող չվաճառվել Ռուսաստանի Դաշնությունում։ Դա պարզապես հնարավոր չէ»։

Գևորգ Պապոյանի խոսքով՝ Հայաստանը չի պատրաստվում կրավորական կեցվածք ընդունել։ «Հետևաբար, այս հարցը, երբ մենք դնում ենք ու ուզում ենք քննարկել, դա առաջին հերթին նշանակում է քննարկել հարց, որի արդյունքում ԵՏՄ սկզբունքները կաշխատեն։ Որովհետև ԵՏՄ սկզբունքների չաշխատելը միայն Հայաստանի խնդիրը չէ, դա ողջ ԵՏՄ-ի խնդիրն է։ Մենք այդ կազմակերպությանը վերաբերվում ենք որպես «մեր» կազմակերպություն, և չենք կարող որևէ չաշխատող մեխանիզմի նկատմամբ ունենալ չեզոք կամ կրավորական կեցվածք»։

Մանրամասները՝ տեսանյութում։