Քաղաքականություն
29.07.2026 | 11:39
ԱՄՆ նախագահ Դոնալդ Թրամփը հայտարարել է, որ իր ուկրաինացի գործընկեր Վլադիմիր Զելենսկիի հետ հանդիպումը շատ լավ է անցել, գրում են ուկրաինական լրատվամիջոցները։
Truth Social-ում գրառմամբ Թրամփը նշել է, որ հանդիպման ընթացքում ինքն ու Զելենսկին քննարկել են բազմաթիվ հարցեր։
«Ինձ համար մեծ պատիվ էր հանդիպել Ուկրաինայի նախագահ Զելենսկիի հետ։ Մենք քննարկել ենք բազմաթիվ հարցեր։ Հանդիպումը շատ լավ է անցել»,- նշել է նա։
Ուկրաինայի նախագահ Վլադիմիր Զելենսկին հայտնել էր, որ Սպիտակ տանն ԱՄՆ նախագահի հետ հանդիպման ժամանակ քննարկել է Patriot-ի արտադրության արտոնագրերի հարցը և «մի քանի այլ գաղափարներ, որոնք կարող են օգնել»։
Ուկրաինայի և ԱՄՆ առաջնորդների հանդիպումը տեղի է ունեցել փակ դռների հետևում՝ առանց լրատվամիջոցների ներկայացուցիչների։ Նախագահներից ոչ մեկը հրապարակային հայտարարություն չի արել։ Զելենսկին Սպիտակ տանն անցկացրել է մեկ ժամից ավելի։
Լրատվամիջոցների հրապարակումների համաձայն՝ երկու նախագահները քննարկել են պատերազմը դադարեցնելու դիվանագիտական ջանքերը և Թրամփի հատուկ ներկայացուցիչների հնարավոր այցը Կիև։
Բրիտանական Financial Times-ը հաղորդում է, որ ԱՄՆ նախագահի հատուկ ներկայացուցիչներ Սթիվ Ուիթկոֆը և Ջարեդ Քուշները համաձայնել են առաջին անգամ այցելել Կիև։ Լրատվամիջոցն այս մասին հայտնել է՝ հղում անելով Սպիտակ տանն անցկացված Թրամփ-Զելենսկի բանակցությունների բովանդակությանը ծանոթ աղբյուրներին։
Թարգմանությունը՝ Էմմա Չոբանյանի
