27.09.2026 | 21:42
Եղիշե Մելիքյանը և Նաիր Թիկնիզյանը՝ Չեռնոգորիայի հավաքականի դեմ խաղի մասին. ՏԵՍԱՆՅՈՒԹ
Իրանը Ֆրանսիայի դեսպանին ԱԳՆ է կանչել՝ երկրի ներքին գործերին «միջամտելու» համար
Քաղաքականություն
27.07.2026 | 16:33
Իրանի արտաքին գործերի նախարարությունը հայտարարել է, որ կանչել է Թեհրանում Ֆրանսիայի դեսպանին՝ բողոքելու այս ամսվա սկզբին կարճ ժամանակով ձերբակալված երկու դիվանագետների վարքագծի դեմ, գրում է France 24-ը։
«Երեկ Թեհրանում Ֆրանսիայի դեսպանը կանչվել է Արտաքին գործերի նախարարություն, որտեղ ընդգծվել է, որ Ֆրանսիայի կառավարությունը պետք է դադարեցնի նման գործողությունները և Իրանի ներքին գործերին միջամտությունը՝ մոլորեցնող պիտակներով»,- շաբաթական ճեպազրույցի ժամանակ ասել է նախարարության խոսնակ Էսմայիլ Բաղային։
Նա նշել է, որ դիվանագետները «միջամտել են Իրանի ներքին գործերին քաղաքացիական հասարակության հետ շփվելու պատրվակով»։ Նրանց գործողությունները, ըստ Բաղայիի, «ոչ մի կերպ չեն արդարացվում 1961 թվականի Վիեննայի դիվանագիտական հարաբերությունների մասին կոնվենցիայով»։
Հուլիսի 20-ին Ֆրանսիայի արտաքին գործերի նախարար Ժան-Նոել Բարրոն հայտարարել էր, որ Իրանում գտնվող երկու ֆրանսիացի դիվանագետներ նախորդ օրը թիրախավորվել են իրանցի պաշտոնյաների կողմից և ենթարկվել են Իսլամական Հանրապետության անվտանգության ծառայությունների կողմից «ծայրահեղ լուրջ սպառնալիքի»։ Նա ասել էր, որ երկուսն էլ «մի քանի ժամով առանց պատճառի ձերբակալվել են, հարցաքննվել, նրանցից մեկը ֆիզիկապես բռնության է ենթարկվել»՝ նախքան դեսպանատուն վերադառնալը։
Թարգմանությունը՝ Էմմա Չոբանյանի
