23.07.2026 | 19:48
2030-ի ֆուտբոլի աշխարհի առաջնությունը կանցկացվի է՛լ ավելի շոգ կլիմայական պայմաններում
Ռուբիոն հայտարարել է, թե Ուկրաինայում պատերազմի ավարտի համար «նոր գաղափարներ» են անհրաժեշտ
Քաղաքականություն
23.07.2026 | 16:42
ԱՄՆ պետքարտուղար Մարկո Ռուբիոն Ֆիլիպինների մայրաքաղաք Մանիլայում Ռուսաստանի արտաքին գործերի նախարար Սերգեյ Լավրովի հետ հանդիպումից հետո հայտարարել է, որ Վաշինգտոնը շարունակում է պատրաստ լինել «կառուցողական դեր» խաղալ Ուկրաինայում պատերազմի ավարտին նպաստելու գործում, հաղորդում է Reuters-ը, որին վկայակոչում է BBC-ի ռուսական ծառայությունը։
Հանդիպումից հետո Ռուբիոն նշել է, որ նախագահ Դոնալդ Թրամփը հստակեցրել է՝ ԱՄՆ-ը պատրաստ է օգնել «անիմաստ պատերազմի» ավարտի հարցում, եթե նման հնարավորություն ստեղծվի։ Նա հավելել է, որ Վաշինգտոնն այս ուղերձը փոխանցել է Մոսկվային, միաժամանակ, հրաժարվելով ներկայացնել Ռուսաստանի դիրքորոշումը բանակցությունների ընթացքում։
«Մենք լավ զրույց ունեցանք, անկեղծ զրույց»,- ասել է Ռուբիոն Լավրովի հետ հանդիպման մասին՝ հավելելով, որ չի մանրամասնի քննարկված թեմաները։
Ռուբիոն նաև նշել է, որ պատերազմի ավարտը պահանջում է «նոր գաղափարներ»։
«Եթե խաղաղություն լինի, դա կլինի նոր գաղափարների և հայեցակարգերի միջոցով, և մենք պատրաստ ենք դրանցից մի քանիսն առաջարկել համապատասխան համատեքստում և ձևով, եթե հնարավորություն ստեղծվի և համապատասխան պայմաններ ստեղծվեն։ Մենք պատրաստ ենք այդ դերը դրական կերպով խաղալ»,- ԱՄՆ պետքարտուղարի խոսքերն է մեջբերում The Guardian-ը։
Թարգմանությունը՝ Էմմա Չոբանյանի
