Ալիևը հաստատել է, որ Գերմանիայի և Ռուսաստանի ներկայացուցիչների միջև գաղտնի հանդիպում է տեղի ունեցել Բաքվում

Ադրբեջանի նախագահ Իլհամ Ալիևը հաստատել է, որ Գերմանիայի և Ռուսաստանի ներկայացուցիչների միջև գաղտնի հանդիպում է տեղի ունեցել Բաքվում։ Բեռլինում Գերմանիայի կանցլեր Ֆրիդրիխ Մերցի հետ համատեղ ասուլիսում նա ասել է, որ Բաքվում  նման  հանդիպման անցկացման մասին տեղեկացել են The Times պարբերականից, և Բեռլին թռչելուց առաջ ինքը տեղեկատվություն է խնդրել Ադրբեջանի պետական ​​սահմանապահ ծառայությունից։

«Հաստատվել է, որ The Times-ում նշված անձինք միաժամանակ գտնվել են Ադրբեջանում։ Հուլիսի 12-ին Բեռլին-Բաքու չվերթով մայրաքաղաք են ժամանել երկու հայտնի դեմքեր՝ տիկին Մերկելի աշխատակազմի նախկին ղեկավար պարոն Պոֆալլան և պարոն Պլատցեկը։ Հուլիսի 14-ին նրանք վերադարձել են։ Նույն օրը՝ հուլիսի 12-ին, Ռուսաստանի նախկին վարչապետ պարոն Զուբկովը և ՌԴ նախագահի աշխատակազմին առընթեր քաղաքացիական հասարակության  զարգացման և մարդու իրավունքների խորհրդի նախագահ պարոն Ֆադեևը Մոսկվայից ժամանել են Բաքու։ Նրանցից մեկը Բաքվից մեկնել է հուլիսի 13-ին, մյուսը՝ հուլիսի 14-ին։ Ո՛չ Գերմանիան, ո՛չ էլ Ռուսաստանը մեզ չեն տեղեկացրել այս մասին։ Այլ կերպ ասած, մեր տարածքը պարզապես օգտագործվել է՝ առանց մեր իմացության։ Ես չեմ կարող որևէ կոնկրետ բան ասել այն մասին՝ արդյո՞ք նման հանդիպում տեղի է ունեցել, քանի որ մենք դրան չենք հետևել։ Այնուամենայնիվ, իմ մեջբերած ավիափոխադրումների վիճակագրությունը հիմք է տալիս ենթադրելու, որ նման գաղտնի հանդիպում տեղի է ունեցել Բաքվում։ Եթե դա կհանգեցնի ռուս-ուկրաինական պատերազմի ավարտին, ապա մենք, իհարկե, ողջունում ենք»,- հայտարարել է Ալիևը։

Նա ընդգծել է, որ պատերազմը պետք է անհապաղ դադարեցվի ցանկացած դեպքում։

«Մեր նպատակն այն է, որ պատերազմը դադարեցվի և տարածաշրջանում խաղաղություն ապահովվի»,- նշել է Ալիևը։

Թարգմանությունը՝ Էմմա Չոբանյանի