Լիպեցկում խոշոր հրդեհ է բռնկվել «արտադրական օբյեկտների տարածքում» հրթիռային տագնապ հայտարարելուց հետո

Ռուսական Լիպեցկում խոշոր հրդեհ է բռնկվել «արդյունաբերական օբյեկտների տարածքում»։ Այս մասին հայտնել է Լիպեցկի մարզի նահանգապետ Իգոր Արտամոնովը, գրում է Meduza-ն։

Նա չի նշել կոնկրետ օբյեկտները։ Հրդեհը սկսվել է Պերեդելչեսկայա փողոցի բաց տարածքում։ Մակերեսը կազմում է մոտավորապես 2500 քառակուսի մետր։ Զոհեր կամ վիրավորներ չկան։

Արտամոնովը նշել է, որ հրդեհի պատճառի մասին տեղեկությունները ճշտվում են: «Կոմերսանտ»-ի հաղորդմամբ էլ՝ հուլիսի լույս 21-ի գիշերը Լիպեցկի մարզում երկու անգամ հրթիռային տագնապ է հայտարարվել, տարածաշրջանում գործում է ուկրաինական անօդաչու թռչող սարքերի հարձակումների սպառնալիքի մասին նախազգուշացում:

Astra-ն, հղում անելով ականատեսների լուսանկարներին և տեսանյութերին, հաղորդում է, որ հրդեհը բռնկվել է տեղի ջերմաէլեկտրակայանի և Նովոլիպեցկի պողպատաձուլական գործարանի (ՆՊԳԿ) միջև ընկած տարածքում։ Ուկրաինական Exilenova+ մոնիթորինգային ալիքը նույնպես հաղորդել է ջերմաէլեկտրակայանի մոտակայքում հրդեհի մասին:

Վլադիմիրում անօդաչուն հարվածել է բազմահարկ շենքի բնակարաններից, հայտնել է նահանգապետ Ալեքսանդր Ավդեևը։ Հարվածի պահին բնակիչները տանը չեն եղել։ Հրդեհը մարվել է։

Ընդհանուր առմամբ, հուլիսի լույս 21-ի գիշերը Ռուսաստանի ՀՕՊ համակարգերը երկրի 10 շրջաններում, բռնակցված Ղրիմի տարածքում, Ազովի ու Սև ծովերի վրա որսացել և ոչնչացրել են 209 ուկրաինական ԱԹՍ, հայտնել է Ռուսաստանի Պաշտպանության նախարարությունը։

Թարգմանությունը՝ Էմմա Չոբանյանի