Քաղաքականություն
20.07.2026 | 14:58
ԱՄՆ-ը դիտարկում է Իրանի դեմ ռազմական գործողությունների ընդլայնման հնարավորությունը։ Այս մասին հայտնել են աղբյուրները The Washington Post-ին: Աղբյուրների համաձայն՝ լայնածավալ գործողության ծրագրերը քննարկվում են անցյալ շաբաթ իրանական հարվածների հետևանքով չորս ամերիկացի զինվորների սպանությունից հետո, գրում է Meduza-ն։
«Պենտագոնը ծրագրում է ավելի լայնածավալ պատերազմ»,- անանունության պայմանով հայտնել է աղբյուրներից մեկը։
Միաժամանակ, The Washington Post-ի աղբյուրի համաձայն՝ Մերձավոր Արևելքում ԱՄՆ զինված ուժերի մոտ սպառվում են հակաօդային պաշտպանության հրթիռներն ու հեռահար զինամթերքը, իսկ այդ ռեսուրսների տեղափոխումը դժվարանում է ռազմական ենթակառուցվածքների վնասման պատճառով։ Աղբյուրը նաև նշել է, որ ԱՄՆ-ը պատրաստ չէ արդյունավետորեն հետ մղել իրանական հարվածները ցամաքային գործողության դեպքում։
«Մենք չունենք գործողություններին անվտանգ կերպով աջակցելու ռեսուրսներ, և չեմ կարծում, որ Սպիտակ տունը գիտի այդ մասին»,- ասել է նա։
Մինչ այդ, ԱՄՆ-ն իններորդ օրն անընդմեջ հարվածներ է հասցրել Իրանի տարածքին։ ԱՄՆ Կենտրոնական հրամանատարության հայտարարության մեջ նշվում է, որ թիրախների թվում են եղել «հրամանատարական կենտրոնները, հակաօդային պաշտպանության և ափամերձ հսկողության օբյեկտները, ծովային օբյեկտները, հրթիռների և անօդաչու թռչող սարքերի արձակման վայրերը, ինչպես նաև կապի ցանցերը»։ Հարվածների նպատակն է՝ է՛լ ավելի նվազեցնել Իրանի կարողությունը Հորմուզի նեղուցում առևտրային նավերի վրա հարձակվելու համար, հայտարարել է CENTCOM-ը։
Իրանի իշխանությունները, իրենց հերթին, հայտնել են Քուվեյթում ամերիկյան բազաներին հարվածների մասին, որտեղ, ըստ Իսլամական հեղափոխության պահապանների կորպուսի, վնասվել են զինամթերքի պահեստներ և ռադարներ, այդ թվում՝ Patriot հակաօդային պաշտպանության համակարգի համար։
Հուլիսի 17-ին Հորդանանում գտնվող ավիաբազային Իրանի հարվածի հետևանքով զոհվել են երկու ամերիկացի զինծառայողներ։ Բացի այդ, ըստ տեղեկությունների, ամերիկյան հրամանատարությունը գտել է մահացած զինծառայողի մարմին, որի ինքնությունը դեռևս պարզված չէ։ The Washington Post-ը հաղորդում է, որ նա նույնպես, հավանաբար, ամերիկացի զինծառայող է։ Ավելին, CENTCOM-ը հայտնել է, որ հուլիսի 18-ին ևս մեկ զինծառայող է զոհվել խոցված իրանական անօդաչու թռչող սարքից չպայթած զինամթերքն ականազերծելիս։
Թարգմանությունը՝ Էմմա Չոբանյանի
