«Մեր թիմում պրոֆեսիոնալներ են, ոչ թե ճիճվի մասնագետներ»․ Լևոն Շիրինյան. ՏԵՍԱՆՅՈՒԹ

Հարցազրույց ԱԺ պատգամավորության թեկնածու (ՔԺ «Վերածնունդ» կուսակցություն) Լևոն Շիրինյանի հետ

-Դուք նորաստեղծ քաղաքական ուժ եք։ ԱԺ-ում ո՞րերորդ ուժն եք հավակնում լինել։

-Նորաստեղծ ենք, բայց հավաքվել են պրոֆեսիոնալ քաղաքագետներ, ոչ թե ինչ-որ ճիճվի մասնագետներ։ Մարդիկ են, որոնք ազգային-քաղաքական պատմությունը լավ գիտեն։ Մեր գաղափարական հենքը շատ հին է։ Մենք բազավորվեցինք որպես ազգային պահպանողական քաղաքական հոսանք, որը 18-րդ դարի 50-60-ականներին է ձևակերպվել։

–«Արարչագործական Հայաստան՝ հայուհուն վայել»։ Ինչո՞ւ հենց հայուհուն։ Հայաստանում այլ ազգության աղջիկներ էլ կան։ Նրանց հետ ինչպե՞ս եք վարվելու։

-«Հայուհին»։ Ես պատկեր եմ առաջարկել։ Մենք ազգային առանձնահատկություն ունենք՝ եթե դուք մեր ժողովրդի պատմությունը լավ գիտեք, էն թուրք, թաթարական էս զբռոդը չկար, էլի, մեր երկրում։ Քուրդ, եզդի և այլն։ Սա վատով չեմ ասում։ Հայաստանն ամբողջական է իր էությամբ։ Մեր ժողովուրդը չափազանց կնամեծար է եղել։ Մենք չենք ասում ՝ հայ Հայաստան, մենք ասում ենք մայր Հայաստան։ Մայր Հայաստան հայուհին կարող է լինե, ոչ թե եզդին։

-Ձեր քաղաքագիտական վերլուծություններում մեծ տեղ է զբաղեցնում Ղարաբաղը։ Հավանաբար հետևել եք երեկ Բակո Սահակյանին ուղղված Փաշինյանի հորդորին, որ՝ ձեր աշխատողները թող զբաղվեն իրենց գործով։ Այս հակամարտությունն ի՞նչ է նշանակում։

-Ես հակամարտություն չեմ տեսնում։ Սա երկխոսության բացասական դրսևորում է։ Ասելու ոճի մասին պետք է հարցնեք Բակո Սահակյանին։ Սրա տակ քաղաքագիտություն չկա, կա քաղաքական խոսույթի ծայրահեղացված դրսևորում։ Թավշյա հեղափոխությունից հետո Սերժի նվիրյալներն Արցախում դժգոհություններ ունեն, ինչպես Դաշնակցությունը, Բարգավաճն ունեն։

-Ընտրողներն ի՞նչ են մտածում ձեր մտքերի մասին։

-Ես ունեմ ահռելի քանակությամբ, 10 հազարից ավելի ֆեյսբուքյան ընկերություն։ Հազվագյուտ են, որ տգիտության ճահճի մեջ մնացածներ են, ես նրանց ջնջում, շպրտում են։ Քաղաքագիտական այն հոսանքն եմ ղեկավարում, որն ունի բազմաթիվ ասպիրանտներ, նորմալ ակադեմիականներ են, քննում են առանց ֆոբիաների և առանց խեղճուկրակ, ցեղասպանված բռնաբարված հայուհու կերպարով հայերի։ Մենք շարժվում ենք Արտաշես Մեծագործի գծած սահմաններով։ մենք վերատիրանալու ենք մեր իրավունքներին։