Սպասում եմ ամեն սցենարի. Նարեկ Կարապետյանը` Ծառուկյանի նման ձերբակալվելու մասին․ ՏԵՍԱՆՅՈՒԹ

«Ուժեղ Հայաստան» դաշինքի ցուցակի առաջին համար Նարեկ Կարապետյանը հայտարարում է, որ տեղեկություն չունի իր անվան հետ կապվող քրեական վարույթի մասին և որևէ ծանուցում չի ստացել։

«Ճիշտն ասած՝ տեղյակ չեմ, ինչ գործ է։ Չեն էլ կանչել, ընդհանրապես տեղյակ չեմ։ Հայաստանում այնպիսի բաներ են, որ մամուլից եմ իմանում»,- ասաց նա Factor.am-ի հետ զրույցում։

Խոսելով Ազգային ժողովում հնարավոր պաշտոններ զբաղեցնելու մասին՝ նա նշեց, որ դեռևս որևէ որոշում չկա՝ ո՛չ խմբակցության ղեկավարի, ո՛չ այլ պաշտոնների մասով։ Նրա խոսքով՝ կգնահատեն, թե դա որքանով կարող է նպաստել իրենց քաղաքական նպատակների իրականացմանը, և միայն հետո որոշում կկայացնեն։

Հարցին, թե մանդատ ստանալու դեպքում մշտապես կմասնակցի՞ խորհրդարանի աշխատանքներին, Կարապետյանը պատասխանեց, որ իրենց գործունեությունը կերևա առաջիկայում։ Նրա խոսքով՝ «Ուժեղ Հայաստան»-ը նպատակ ունի փոխել պետական կառավարման նկատմամբ մակերեսային մոտեցումը և Ազգային ժողովի աշխատանքն ավելի հասկանալի ու արդյունավետ դարձնել քաղաքացիների համար։

Անդրադառնալով ընդդիմադիրների նկատմամբ հնարավոր ճնշումներին՝ Կարապետյանը նշեց, որ Հայաստանում ընդդիմադիր գործունեությունը ենթադրում է նման ռիսկեր, և իրենք պատրաստ են ցանկացած հնարավոր սցենարի։

Լրագրողի հարցին, թե իրեն մշտապես ուղեկցող անձինք անվտանգության աշխատակիցնե՞ր են, Կարապետյանը պատասխանեց, որ իրենց թիմից մարդիկ են, որոնք ուղեկցում են իրեն՝ հաշվի առնելով, իր գնահատմամբ, իրավապահ համակարգի ոչ թափանցիկ աշխատանքը։

Մանրամասները` տեսանյութում։

Նարեկ Կիրակոսյան