Ես սիրում եմ Երևանը, այնտեղ հարմարավետ է: Մոսկվայում rusarminfo.ru-ին տված հարցազրույցում ասել է աշխարհահռչակ շանսոնյե Շառլ Ազնավուրի որդին՝ Նիկոլա Ազնավուրը՝ խոսելով այն մասին, թե ինչպես է որոշել Հայաստան փոխադրվել և ինչպես է իրեն զգում նախնիների հայրենիքում:
Շվեյցարիայում մեծացած Նիկոլան Հայաստանում բազմիցս է եղել, սակայն փոխադրվելու որոշումը կայացրել է այս տարի:
Գլխավոր դժվարությունը, որին բախվել է Ազնավուր կրտսերը, լեզվի չիմացությունն է եղել:
«Հիմա ակտիվորեն հայերեն եմ սովորում: Հայերենը շատ բարդ է, բայց կամաց-կամաց ստացվում է խոսել: Հայաստանում ապրելով՝ կկարողանամ ավելի արագ սովորել»,- նշել է նա:
Նիկոլան, ով մորական կողմից շվեդական արմատներ ունի, ասել է՝ Հայաստանում իրեն հաճախ որպես հայ չեն ընդունում, և ստիպված է լինում ապացուցել, որ իսկական հայ է. «Ես հայ եմ, և դա չի քննարկվում»:
