ԿԳՄՍՆ-ն Հանրապետության հրապարակի ստորգետնյա տարածքների ներառմամբ թանգարանային համալիրի ընդլայնման առաջարկների հավաքագրում է նախաձեռնում

Կրթության, գիտության, մշակույթի և սպորտի նախարարությունը բաց հրավեր է հայտարարել Հանրապետության հրապարակի թանգարանային համալիրի՝ ստորգետնյա տարածքների ներառմամբ ընդլայնման ճարտարապետական հայեցակարգերի հավաքագրման համար։ Առաջարկները կարող են ներկայացնել ճարտարապետներ, քաղաքաշինարարներ, թանգարանային ոլորտի և մշակութային ժառանգության պահպանության մասնագետներ, իսկ հայտերի ընդունումը կշարունակվի հուլիսի 10-ից մինչև սեպտեմբերի 10-ը։

«ՀՀ կրթության, գիտության, մշակույթի և սպորտի նախարարությունը հայտարարում է բաց հրավեր՝ ուղղված Հանրապետության հրապարակում տեղակայված թանգարանային շենքում գործող՝ Հայաստանի պատմության թանգարանի, Հայաստանի ազգային պատկերասրահի, Եղիշե Չարենցի անվան գրականության և արվեստի թանգարանի տարածքների ընդլայնման և զարգացման ճարտարապետական նախագծի գաղափարների ու հայեցակարգային առաջարկների հավաքագրմանը։

Կարող են դիմել՝

• ճարտարապետական կազմակերպություններ,
• քաղաքաշինարարներ,
• կառուցվածքային և ինժեներական նախագծողներ,
• թանգարանային և ցուցադրական տարածքների նախագծման մասնագետներ,
• պատմամշակութային ժառանգության պահպանության մասնագետներ,
• լանդշաֆտային ճարտարապետներ,
• ինտերիերի և ցուցադրության դիզայներներ,
• արվեստագետներ,
• թանգարանագետներ և մշակութային կառավարման մասնագետներ,
• հնագետներ և հետազոտական հաստատություններ, միջգիտակարգային խմբեր։

Խրախուսվում է տարբեր ոլորտների մասնագետների համատեղ մասնակցությունը։ Թիմում ցանկալի է ունենալ առնվազն ճարտարապետության, ինժեներական նախագծման, ժառանգության պահպանության և թանգարանային գործունեության փորձառություն ունեցող մասնագետներ»,- ասված է հաղորդագրությունում։