28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Դամասկոսում պայթյունների հետևանքով առնվազն 18 մարդ է վիրավորվել
Քաղաքականություն
07.07.2026 | 14:21
Դամասկոսում պայթյունների հետևանքով, որոնք որոտացել են Ֆրանսիայի նախագահի և նրա սիրիացի գործընկերոջ հանդիպման ժամանակ, վիրավորվել է առնվազն 18 մարդ, հայտնել է Սիրիայի ներքին գործերի նախարարությունը, գրում է The Hill-ը։
Էմանուել Մակրոնը նախագահական պալատ էր ժամանել՝ հանդիպելու Սիրիայի նախագահ Ահմադ ալ-Շարաայի հետ, երբ պայթյուններ են որոտացել Four Seasons հյուրանոցի մոտ, որտեղ, սիրիական լրատվամիջոցների հաղորդմամբ, իջևանել է Ֆրանսիայի նախագահը։
Ելիսեյան պալատի պաշտոնյան ասել է, որ Մակրոնն անվտանգ է, և որ նրա հանդիպումն ալ-Շարաայի հետ շարունակվում է։ Մակրոնն առաջին խոշոր արևմտյան առաջնորդն է, որն այցելում է Սիրիա ալ-Շարաայի իշխանության գալուց ի վեր։ Նա Դամասկոս է մեկնել Անկարայում կայանալիք ՆԱՏՕ-ի գագաթնաժողովին ժամանելուց առաջ։
Նշվում է, որ այս պայթյունները հարված են ալ-Շարաայի համար, որն իշխանության է եկել 2024 թվականին Բաշար Ասադին տապալած ապստամբությունը գլխավորելուց հետո։
Սիրիայի պետական լրատվամիջոցների կողմից տարածված հայտարարության մեջ Ներքին գործերի նախարարությունը նշել է, որ մայրաքաղաքի սրտում պայթուցիկ սարքեր են գործի դրվել, որոնցից մեկը տեղադրված է եղել աղբամանում, իսկ մյուսը՝ կայանված մեքենայում։ Տեղեկատվության համաձայն՝ վիրավորներից չորսը ոստիկաններ են, մահվան դեպքերի մասին տեղեկություններ չեն ստացվել։ Հարձակման վայրում այժմ հետաքննություն է ընթանում։
Հարձակման վայրից ծխի մեծ ամպ է երևացել։ Տարածքը գտնվում է Դամասկոսի մարդաշատ փողոցում և մոտ է Զբոսաշրջության նախարարության գլխավոր գրասենյակին ու Դամասկոսի ազգային թանգարանին։
Սոցիալական ցանցերում լայնորեն տարածված կադրերում երևում է, թե ինչպես են այրվում միկրոավտոբուս և մոտոցիկլետ, իսկ փողոցում արյան հետքեր կան։ Ոչ մի խումբ անմիջապես պատասխանատվություն չի ստանձնել միջադեպի համար։
Նախագահական պալատ ժամանելուց առաջ Մակրոնը հանդիպել է Սիրիայի քաղաքացիական հասարակության անդամների հետ։
Թարգմանությունը՝ Էմմա Չոբանյանի
