15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Կառավարությունը հաստատել է ջերմատնային տնտեսությունների վարկերի տոկոսադրույքների սուբսիդավորման ծրագիրը
Տնտեսություն
02.07.2026 | 23:02
Կառավարությունը հաստատել է ջերմատնային տնտեսություններին տրամադրվող վարկերի տոկոսադրույքների սուբսիդավորման ծրագիրը։ Որոշումն ընդունվել է Կառավարության նիստում։
Ծրագիրը նպատակ ունի մեղմել ջերմատնային տնտեսությունների կրած ֆինանսական կորուստները, որոնք առաջացել են Ռոսսելխոզնադզորի կողմից բուսասանիտարական հսկման ենթակա ապրանքների նկատմամբ կիրառված արտահանման սահմանափակումների հետևանքով։
Նախագծի հիմնավորման համաձայն՝ ջերմատնային տնտեսությունների գործունեությունը և դրանց զարգացումը կարևոր նշանակություն ունեն բուսաբուծության ոլորտի համար, և ստեղծված իրավիճակում անհրաժեշտ է աջակցել դրանց արտադրական գործունեության անխափան իրականացմանը՝ վարկային ռեսուրսների ներգրավման միջոցով։
Ծրագրից կարող են օգտվել 1 հեկտար և ավելի մակերեսով ջերմատնային տնտեսություն տնօրինող իրավաբանական անձինք կամ անհատ ձեռնարկատերերը, որոնք 2026 թվականի ընթացքում արտադրել և իրացրել են գյուղատնտեսական արտադրանք։
Շահառուները կարող են մինչև 2026 թվականի սեպտեմբերի 1-ը դիմել ֆինանսական կառույցներին՝ ծրագրի պահանջներին համապատասխան վարկեր ստանալու համար։
Աջակցությունը տրամադրվելու է ֆինանսական կառույցների կողմից շահառուներին տրամադրված նպատակային վարկերի տոկոսադրույքների սուբսիդավորման ձևով։
Վարկային միջոցները պետք է ծախսվեն անկանխիկ եղանակով՝ սպառված գազի, էլեկտրաէներգիայի և ջրի վճարների, պետական կամ համայնքային բյուջե հարկերի և պարտադիր վճարումների, աշխատավարձերի և դրան հավասարեցված վճարումների, ինչպես նաև պարարտանյութերի, սերմերի և սածիլների ձեռքբերման նպատակով։
Վարկը տրամադրվելու է տարեկան մինչև 14 տոկոս փաստացի տոկոսադրույքով, իսկ տոկոսադրույքի սուբսիդավորումը կիրականացվի 12 տոկոսային կետով։
Վարկի մարման ժամկետը սահմանվում է մինչև 18 ամիս։ Վարկի մայր գումարի և սուբսիդավորվող տոկոսագումարի համար տրամադրման օրվանից կսահմանվի 12 ամիս արտոնյալ ժամկետ։
Յուրաքանչյուր 1 հեկտար ջերմատան համար առավելագույն վարկի սահմանաչափը կկազմի ոչ ավելի, քան 100 միլիոն դրամ։ Յուրաքանչյուր շահառու ծրագրից կարող է օգտվել մեկ անգամ և վարկավորվել միայն մեկ ֆինանսական կառույցի կողմից։
Վարկ ստանալու համար շահառուն պետք է ֆինանսական կառույցին ներկայացնի դիմում, 2026 թվականին իրացված գյուղատնտեսական արտադրանքի վերաբերյալ ՊԵԿ-ի տրամադրած տեղեկանքը, ջերմատնային տնտեսության անշարժ գույքի նկատմամբ իրավունքների պետական գրանցման վկայականի պատճենը, ինչպես նաև համաձայնություն՝ ծրագրի շրջանակում իր մասին տեղեկությունները նախարարությանը կամ այլ պետական մարմնին փոխանցելու վերաբերյալ։
