21.10.2026 | 23:30
Էրդողանն ու Ալիևը հեռախոսազրույց են ունեցել՝ Բաքվի կողմից Անկարայի նկատմամբ կոշտ քայլերի ֆոնին
1915թ․ իրադարձությունների հետ կապված Իսրայելի քաղաքական որոշումը ոչ այլ ինչ է, քան սեփական հանցագործությունները թաքցնելու փորձ․ Թուրքիայի ՊՆ
Քաղաքականություն
02.07.2026 | 16:11
Թուրքիայի Ազգային պաշտպանության նախարարությունը հայտարարել է, որ Իսրայելի քաղաքական որոշումը՝ 1915 թվականի իրադարձությունները ցեղասպանություն ճանաչելու մասին, ոչ այլ ինչ է, քան սեփական հանցագործությունները թաքցնելու փորձ։ Այն նաև դատապարտել է Իսրայելի հարվածները Լիբանանին և Սիրիային՝ կոչ անելով Իսրայելին անհապաղ դադարեցնել տարածաշրջանում էսկալացիոն հարձակումները, փոխանցում է TRT Haber-ը։
Ճեպազրույցի ժամանակ Թուրքիայի ՊՆ մամուլի խոսնակ Զեքի Աքթյուրքը հայտարարել է, թե Իսրայելը, որը «տարածաշրջանում կայուն խաղաղություն և կայունություն հաստատելու ամենամեծ խոչընդոտն է», շարունակում է հարձակումները տարածաշրջանում՝ չնայած Լիբանանի հետ ձեռք բերված համաձայնագրին, ինչպես նաև շարունակում է հարձակումներ իրականացնել Կունեյտրայում և Դարաայում՝ անտեսելով Սիրիայի ինքնիշխանությունը և նրա ժողովրդի կյանքն ու ունեցվածքը։
Աքթյուրքն ասել է, թե Իսրայելի կառավարության, որը Միջազգային դատարանում դատվում է ցեղասպանության համար, և նրա ղեկավարների կողմից, որոնց նկատմամբ Միջազգային քրեական դատարանը ձերբակալման օրդեր է տվել, 1915 թվականի իրադարձությունների վերաբերյալ ընդունված քաղաքական որոշումը ոչ այլ ինչ է, քան իրենց հանցագործությունները թաքցնելու փորձ։
«Այս համատեքստում մենք ընդգծում ենք, որ միջազգային հանրությունը պետք է ավելի վճռական դիրքորոշում և կոնկրետ քայլեր ընդունի Իսրայելի կողմից տարածաշրջանում իրականացվող էքսպանսիոնիստական, անկայունացնող և սադրիչ քաղաքականության դեմ՝ դրանց վերջ դնելու համար։ Մենք նաև վերահաստատում ենք ԱՄՆ-ի և Իրանի միջև բանակցություններում համապատասխան կողմերի կողմից խոհեմ և պատասխանատու մոտեցման դրսևորման կարևորությունը՝ տարածաշրջանում երկարատև խաղաղության և կայունության հասնելու համար»,- հայտարարել է նա։
Հավելենք, որ ավելի վաղ Իսրայելի կառավարությունը Հայոց ցեղասպանության ճանաչման վերաբերյալ որոշում էր ընդունել, որին արձագանքել էին Թուրքիայի ԱԳՆ-ն, նախագահականը, ինչպես նաև երկրի նախագահ Ռեջեփ Թայիփ Էրդողանը։ Բոլոր հայտարարություններում ընդգծվել էր, թե Իսրայելն այդ որոշմամբ փորձում է քողարկել սեփական հանցագործությունները։
Թարգմանությունը՝ Էմմա Չոբանյանի
