Թուրքիայի նախագահականն արձագանքել է Իսրայելի կառավարության կողմից Հայոց ցեղասպանության ճանաչմանը

«Սա մաքուր երեսպաշտություն է իսրայելական վարչակազմի կողմից, որը կատարել է 21-րդ դարի ամենադաժան կոտորածը՝ անողոքաբար սպանելով տասնյակ հազարավոր անմեղ քաղաքացիների, այդ թվում՝ նորածինների, կանանց և տարեցների, համարձակվել պատմական իրադարձություններն օգտագործել որպես քաղաքական զենք»։ Այս մասին ասվում է Իսրայելի կառավարության կողմից Հայոց ցեղասպանության ճանաչման առնչությամբ Թուրքիայի նախագահականի հաղորդակցության բաժնի տնօրեն Բուրհանեթթին Դուրանի՝ X-ի միկրոբլոգում տարածված հայտարարության մեջ։

«Իսրայելի կողմից 1915 թվականի իրադարձությունները որպես, այսպես կոչված, «ցեղասպանություն» ճանաչելն անօգուտ փորձ է՝ ծածկելու անմեղ պաղեստինցիների թափված արյունը, Մերձավոր Արևելքում նրանց կողմից իրականացվող պետական ​​ահաբեկչությունը և անպատիժ կերպով կատարվող մարդկության դեմ հանցագործությունները»,- ասվում է Դուրանի տարածած հայտարարությունում։

Ըստ նրա՝ «մարդկության պատմության մեջ ամենամեծ հեգնանքն այն է, որ բարոյական և պատմական պարտավորությունների մասին խոսողները նույնն են, ովքեր այսօր անդադար ռմբակոծում են հիվանդանոցները, դպրոցները, պաշտամունքի վայրերը և փախստականների ճամբարները՝ ոտնահարելով միջազգային իրավունքը»։

«Միջազգային դատարանում ցեղասպանության համար դատվողները բացարձակապես իրավունք չունեն պատմության վերաբերյալ դասախոսություններ կարդալու Թուրքիային կամ խղճի պահապանի դեր ստանձնելու»,- հայտարարել է Դուրանը։

Ավելի վաղ հայտարարություն էր տարածել նաև Թուրքիայի ԱԳՆ-ն։ Անկարան Իսրայելի քայլը կապել էր Գազայում իրադարձությունների հետ՝ նշելով, թե Իսրայելի կառավարությունը «1915 թվականի դեպքերի վերաբերյալ ընդունած քաղաքական որոշմամբ նպատակ ունի քողարկել սեփական հանցագործությունները»։

Թարգմանությունը՝ Էմմա Չոբանյանի