Ժողովրդի կամքը եղել է, որ ԲՀԿ-ն անցնի Խորհրդարան, որովհետև 4%-ը հաղթահարել է. Արամ Օրբելյան․ ՏԵՍԱՆՅՈՒԹ

Սահմանադրական դատարանում ընտրությունների արդյունքների վիճարկման գործով եզրափակիչ ելույթների փուլն է։ «Բարգավաճ Հայաստան» կուսակցության ներկայացուցիչ Արամ Օրբելյանն իր ելույթում շեշտեց՝ ԲՀԿ-ն, իրականում, հաղթահարել է 4%-ի շեմը, սակայն Կենտրոնական ընտրական հանձնաժողովի գործողությունների կամ անգործության հետևանքով դուրս է մնացել խորհրդարանից․

«Հունիսի 8-ին ԲՀԿ-ն հայտարարում է, որ առկա են առնվազն մի քանի տեղամասում տվյալների սխալ մուտքագրումներ։ Այդ մասին տեղեկացնում է ԿՀԸ-ին՝ սկզբում աշխատակարգային ռեժիմով։ Հունիսի 8-ին, ժամը 16։10-ին Իվետա Տոնոյանը կատարում է հրապարակում իր սոցիալական էջում, որտեղ հստակ նշվում է 4 ընտրատեղամաս՝ 27/7, 11/20, 27/26, 38/53։ Նշվում է, որ մի տեղ ստացել է 77 ձայն, արձանագրվել է 1, մի տեղ ստացել ենք 26 ձայն, արձանագրվել է 1 և այլն։ Մենք խոսում ենք ոչ թե նրա մասին, որ սխալ են հաշվել, այլ հաշված է եղել ճիշտ, արձանագրությունը ճիշտ է գրվել, բայց ԿՀԸ-ն չի կարողանում այդ թվերը ինչ-որ ձևով մուտքագրել։

Ինչո՞ւ է սա կարևոր, որովհետև եթե ճիշտ հաշվվեր, ամսի 8-ին ասվելու էր՝ ԲՀԿ-ն հաղթահարել է 4%-ի շեմը։ Հունիսի 10-ին Իվետա Տոնոյանը անում է մեկ այլ հրապարակում, որտեղ ասվում է, որ մնացած ավելի քան 600 տեղամասերի հետ վերահաշվարկ են անում, ԲՀԿ-ի օգտին արդեն ավելացել է 140 ձայն։ Հունիսի 14-ին ԿՀԸ-ն ընդունում է արդյունքների ևս մեկ որոշում, որում այդ տեղամասերի արդյունքները համարելով անվավեր, ամբողջությամբ գրանցում է զրո և ասում է՝ այ, նորից ԲՀԿ-ն չանցավ»։

Հայցվոր կողմը դատարանի ուշադրությունը հրավիրեց միջազգային պրակտիկայում հայտնի Favor Voti (հօգուտ քվեի) սկզբունքի վրա։ Ըստ ներկայացուցչի՝ եթե կա որևէ հիմնավոր կասկած կամ տեխնիկական սխալ, որը կարող է ազդել ընտրողի կամքի վրա, դատարանը պարտավոր է որոշում կայացնել հօգուտ քվեարկողի իրավունքների պաշտպանության։

«Մենք պաշտպանում ենք 58,500 քաղաքացիների ձայնը։ Ապացուցված է, որ ԲՀԿ-ն ստացել է այդքան ձայն, և որևէ տեխնիկական խոչընդոտ չպետք է զրկի այդ մարդկանց իրենց ներկայացուցչությունն ունենալուց»,- ասաց նա։

Ելույթի ավարտին Օրբելյանը Սահմանադրական դատարանին ներկայացրեց երկու հնարավոր լուծում. ամբողջությամբ անվավեր ճանաչել ընտրությունների արդյունքները։, իսկ եթե առաջին կետը չբավարարվի, ապա վերանայել մանդատների բաշխման կարգը և ԲՀԿ-ին հատկացնել հասանելիք 5 մանդատները։

Մանրամասները՝ տեսանյութում։