«Եթե Փաշինյանի խոսքը և վարքագիծը համարվում է իրավաչափ, ապա մի դժգոհեք Վարդան Ղուկասյանի բառապաշարից»․ ՏԵՍԱՆՅՈՒԹ

Սահմանադրական դատարանում շարունակվում են խորհրդարանական ընտրությունների արդյունքների վիճարկման վերաբերյալ լսումները։ Եզրափակիչ ելույթով հանդես եկավ «Դեմոկրատիա Օրենք Կարգապահություն» կուսակցության ներկայացուցիչը նշելով՝ բազմաթիվ խախտումներով են ուղեկցվել ընտրությունները, դրանք կազմակերպված և զանգվածային բնույթ են կրել։

«Արդեն իսկ հաստատված են համարվել հետևյալ փաստերը՝ թվով 115 քրեական վարույթներ, յուրաքանչյուրն առանձին իրենց բազմակի դեպքերով, և 100-ից ավելի ընտրակաշառքի վերաբերյալ ուսումնասիրվող օպերատիվ-հետախուզական փաստեր։ Նշված փաստերն անհերքելի են և հաստատվել են դատարանում։ Այս խախտումները եղել են կազմակերպված, զանգվածային, կրկնվող և պարբերական բնույթի։ Դրանք հանգեցրել են Սահմանադրության 7-րդ հոդվածով ամրագրված սկզբունքների խախտման, ինչի պայմաններում հնարավոր չէ պարզել ընտրությունների իրական արդյունքները։ Կենտրոնական ընտրական հանձնաժողովը նշվածի մասով չի ձեռնարկել ոչինչ, մինչդեռ պարտավոր էր՝ հիմք ընդունելով «Վարչարարության հիմունքների և վարչական վարույթի մասին» օրենքը, Ընտրական օրենսգիրք սահմանադրական օրենքը, իր նախաձեռնությամբ հարուցել վարչական վարույթներ։

Ընտրական օրենսգրքի շրջանակներում ԿՀԸ-ն պետք է պարզեր այս փաստերի կապը կուսակցության կամ դաշինքի, կամ վերջինիս պատգամավորի թեկնածուի հետ և հաստատվելու դեպքում կիրառեր սանկցիաներ՝ նախազգուշացում, տալ հանձնարարական կամ զրկել կուսակցությանը ընտրություններին մասնակցությունից։ Դուք պարտավոր էիք վարույթ հարուցել։ Այսինքն, ըստ ձեր տրամաբանության, ընտրակաշառքը որևէ պարագայում չի կարող ազդեցություն ունենալ ընտրության արդյունքների վրա, քանի որ չունեք վերջնական դատական ակտ։ Իսկ եթե մեկ տարի անց հաստատվեն այդ դեպքերը, ի՞նչ եք անելու՝ անվավե՞ր եք ճանաչելու արդեն այս ընտրությունները»։

Վարդան Ղուկասյանի ղեկավարած ուժի ներկայացուցչի պնդմամբ՝ «Ուժեղ Հայաստան» դաշինքի նկատմամբ իրականացվել է ենթադրյալ հակաքարոզչությունը պետական մարմինների կողմից։

«ԿՀԸ-ն գտել է, որ առկա է հակաքարոզչություն Հակակոռուպցիոն կոմիտեի կողմից։ ԿՀԸ-ն գրություններ է ուղարկել կոմիտեին, որպեսզի զերծ մնան կուսակցության անվանումն իրենց հրապարակումներում օգտագործելուց, սակայն կոմիտեն անտեսել է դա։ ԿՀԸ-ն այդպես էլ վարչական վարույթ չհարուցեց։ ԿՀԸ-ն միակ մարմինն է, որը վերահսկողություն է իրականացնում ընտրության օրինականության նկատմամբ, և նրա անգործությունը հանգեցրել է քրեական օրենսգրքով սահմանված հանցանքի»։

Անդրադառնալով վարչական ռեսուրսին, նա նշեց, որ «թաքնված քարոզչությունը, կառավարության որոշումները, ատելության խոսքն ու վախի մթնոլորտը խախտումներ են, որոնք ենթակա են ուսումնասիրման Սահմանադրական դատարանի կողմից»։ «Եթե արդարադատության նախարարը համարում է այս վարքագիծը իրավաչափ, ապա մի՛ դժգոհեք «Դոգ» կուսակցության նախագահի եթերներից ու բառապաշարից»։ Ելույթի ավարտին հայցվորի ներկայացուցիչը կոչ արեց Սահմանադրական դատարանին հանդես գալ որպես իրավական պետության պահապան։ Հղում անելով հայտնի լատինական ասույթին՝ «Իրավունքը գիտություն է բարու և արդարի մասին», նա շեշտեց, որ դատարանի կայացրած ցանկացած որոշում հասարակության կողմից անցկացվելու է հենց այդ «արդարության մաղի» միջով։

Մանրամասները՝ տեսանյութում։