Իրանը հայտարարում է, որ Կատարում բանակցությունները կվերաբերվեն ԱՄՆ-ի հետ գործարքին և սառեցված ակտիվներին

Չորեքշաբթի Իրան-Կատար բանակցություններում կքննարկվեն Թեհրանի և ԱՄՆ-ի միջև կնքված համաձայնագրի իրականացման, ինչպես նաև սառեցված ակտիվների ապասառեցման հարցերը։ Այս մասին հայտարարել է Իրանի արտաքին գործերի նախարարության խոսնակ Էսմայիլ Բաղային, գրում է CNN-ը։

«Վաղը Դոհայում, հավանաբար, տեղի կունենա քննարկում կատարական կողմի հետ՝ փոխըմբռնման հուշագրի որոշ դրույթների իրականացման վերաբերյալ, այդ թվում՝ Իրանի սահմանափակված ակտիվների ազատման վերաբերյալ դրույթի»,- ասել է Բաղային՝ հավելելով, որ Իրանի բանակցային թիմն առաջիկա օրերին ամերիկյան պատվիրակության հետ հանդիպելու ծրագիր չունի։

Կատարի արտաքին գործերի նախարարության խոսնակ Մաջեդ ալ-Անսարին ավելի վաղ հայտարարել էր, որ ԱՄՆ նախագահի բանագնացները՝ դեսպան Սթիվ Ուիթկոֆը և փեսան՝ Ջարեդ Քուշները, ժամանել են Դոհա՝ կատարցի միջնորդների հետ հանդիպելու, սակայն ընդգծել էր, որ Իրանի պաշտոնյաների հետ հանդիպում չի լինի։ Նա հավելել էր, որ Իրանի սառեցված միջոցներից 6 միլիարդ դոլարը դեռևս չի փոխանցվել Թեհրան, բայց դա տեղի կունենա «բանակցությունների առաջընթացի համաձայն»։

Իր հերթին, Բաղային նաև հայտարարել է, որ  Իրանը կարձագանքի ԱՄՆ-ի կողմից Մերձավոր Արևելքում պատերազմը դադարեցնելու նպատակով կնքված փոխըմբռնման հուշագրի ցանկացած խախտման։

«Մենք որևէ գործողություն անպատասխան չենք թողնի։ Ինչպես ցույց են տվել Իրանի հզոր զինված ուժերը, Իրանի Իսլամական Հանրապետության նպատակների դեմ ուղղված ցանկացած ագրեսիայի ակտ կարժանանա անհապաղ և վճռական պատասխանի։ Նման գործողությունները կհամարվեն փոխըմբռնման հուշագրի 1-ին հոդվածի խախտում։ Բնականաբար, եթե նման խախտումները կրկնվեն և շարունակվեն, այս գործընթացի շարունակությունը կհանդիպի դժվարությունների»,- լրագրողներին ասել է Բաղային։

Թարգմանությունը՝ Էմմա Չոբանյանի