Դուք տարբեր դիրքորոշումներ եք արտահայտել․ որտե՞ղ են գտնվել զինվորները․ ՍԴ դատավորը՝ Հովակիմյանին․ ՏԵՍԱՆՅՈՒԹ

Սահմանադրական դատարանում Ազգային ժողովի ընտրությունների արդյունքների վիճարկման գործով քննության ընթացքում դատավոր Երվանդ Խունդկարյանը հարցեր ուղղեց Կենտրոնական ընտրական հանձնաժողովի նախագահ Վահագն Հովակիմյանին՝ անդրադառնալով ինչպես ԿԸՀ-ի ընդունած որոշումների ձևակերպմանը, այնպես էլ ընտրությունների օրը տեղի ունեցած առանձին միջադեպերին։

Դատավորը նախ հիշեցրեց, որ հունիսի 14-ին ԿԸՀ-ն բոլոր յոթ անդամների ստորագրությամբ, առանց որևէ վերապահման, հաստատել է Ազգային ժողովի ընտրությունների արդյունքների արձանագրությունը։ Հարցեր ուղղեց նաև 10/51 և 35/65 ընտրատեղամասերում քվեարկության ավարտից հետո զինվորների մասնակցությամբ արձանագրված իրավիճակի վերաբերյալ։

Դատավորը հետաքրքրվեց, թե «20։00-ից պակաս» արտահայտությամբ ԿԸՀ նախագահը կոնկրետ ինչ ժամանակահատված է նկատի ունեցել, քանի՞ զինվոր է գտնվել քվեարկության սենյակում ժամը 20։00-ի դրությամբ և արդյոք զինվորները շարունակել են քվեարկել նաև այդ ժամից հետո։

Հովակիմյանը պատասխանեց, որ ամբողջական պատկեր հնարավոր է եղել ձևավորել միայն հունիսի 11-ին որոշում կայացնելիս։ Նրա խոսքով՝ նախնական տեղեկությունները եղել են այն մասին, որ ընտրողներ են գտնվել տեղամասի մոտ, իսկ տեսագրությունները պատկերել են միայն քվեարկության սենյակը, ուստի դրանց միջոցով հնարավոր չի եղել պարզել՝ արդյոք զինվորները դրսից են մուտք գործել 20։00-ից հետո։

Նա հավելեց, որ այդ հարցում հաշվի են առնվել նաև վստահված անձանց գրառումները, որոնց համաձայն՝ տեղամասը փակված չի եղել։ Դատավորը նաև խնդրեց դատարանին ներկայացնել այդ ընտրատեղամասերի նախնական արձանագրությունները՝ մինչև դրանցում արձանագրված անճշտությունների հիմքով արդյունքների զրոյացումը։

Հովակիմյանը հայտնեց, որ ԿԸՀ-ն կներկայացնի համապատասխան արձանագրությունները, այդ թվում՝ նաև 12/13 ընտրատեղամասինը։ Խունդկարյանը վերաքվեարկության հնարավորության վերաբերյալ ևս հարց ուղղեց ԿԸՀ նախագահին՝ հետաքրքրվելով, թե արդյոք ընտրողների կողմից մյուս տեղամասերի արդյունքներն արդեն հայտնի լինելու պայմաններում վերաքվեարկությունը չի հանգեցնի այսպես կոչված տակտիկական քվեարկության։ Հովակիմյանը պատասխանեց, որ նման խոչընդոտ չի տեսնում և չի կիսում այդ տեսակետը։

Մանրամասները՝ տեսանյութում։