04.09.2026 | 23:57
Էդուարդ Սպերցյանի գոլն օգնեց «Ալ Ահլիին» վստահ հաղթանակ տանել. ՏԵՍԱՆՅՈՒԹ
Ինչո՞ւ եք 4 օր անց արձագանքել ժամը 20-ից հետո ընթացող քվեարկություններին․ ՍԴ դատավորը՝ ԿԸՀ նախագահին․ ՏԵՍԱՆՅՈՒԹ
Քաղաքականություն
29.06.2026 | 13:37
Սահմանադրական դատարանում շարունակվում է հունիսի 7-ի ընտրությունների արդյունքների վիճարկման գործով նիստը։ Այժմ դատավարության կողմերին հարցեր են ուղղում դատավորները։
Էդգար Շաթիրյանը Կենտրոնական ընտրական հանձնաժողովի նախագահին հարցեր ուղղեց 2 տեղամասերի վերաբերյալ, որտեղ 20։00-ից քվեարկությունը շարունակվել է, զինվորներ են քվեարկել։
«Ինչո՞ւ Կենտրոնական ընտրական հանձնաժողովը, որպես վերադաս ընտրական հանձնաժողով, այս երևույթներին արձագանքել է չորս օր անց, այն պայմաններում, երբ ահազանգեր եղել են քվեարկության ավարտից անմիջապես հետո»,- հետաքրքրվեց դատավորը։
Ի պատասխան Վահագն Հովակիմյանը նշեց՝ մինչև հունիսի 9-ը այն ժամկետն էր, երբ ընտրության մասնակիցները կարող էին տեղամասային ընտրական հանձնաժողովների քվեարկության արդյունքները անվավեր ճանաչելու պահանջ ներկայացնել։
«Այսինքն՝ խնդիրների հավաքագրումը և դրանց անդրադառնալը մենք, ըստ էության, պիտի անեինք ամսի 9-ից հետո։ Նաև դա այն ժամանակն է, երբ սկսվում է վերահաշվարկների գործընթացը։ Զուգահեռ բոլոր 38 ընտրատարածքային հանձնաժողովներում ընթանում են վերահաշվարկներ։ Մենք խնդրով սկսել ենք զբաղվել հունիսի 10-ին, որովհետև արդեն ակնհայտ էր, որ մասնակիցների կողմից անվավերության պահանջ չի ներկայացվել, բայց կա հանրային պահանջ։ Այս չորս տեղամասերում տեղի ունեցած խախտումները մեծ հնչեղություն են ստացել, և մեզ անհրաժեշտ էր խորությամբ ուսումնասիրել, գնահատել և թույլ չտալ, որպեսզի այդ խախտումները ստվերեն ընդհանուր ընտրությունների արդյունքները»,- ասաց նա։
Մանրամասները՝ տեսանյութում։
