«Փաշինյանն ասում է՝ ընդդիմության ձայները լեգիտիմ չեն, ո՞նց կարող է իշխանությունը լեգիտիմ լինել»․ «Հանուն Հանրապետության» ներկայացուցիչ․ ՏԵՍԱՆՅՈւԹ

Հունիսի 7-ի խորհրդարանական ընտրությունների արդյունքների վիճարկման գործով Սահմանադրական դատարանում հրավիրված նիստի 3-րդ օրն է։

«Հանուն Հանրապետության» կուսակցության ներկայացուցիչ Վահագն Մարտիրոսյանը հարցեր ուղղեց «Քաղաքացիական պայմանագիր» կուսակցության ներկայացուցիչներին․ «Ձեր կուսակցության ղեկավարի հրապարակային գնահատմամբ՝ ընդդիմության հայտնի հատվածի ստացած քվեները լեգիտիմ չեն կամ ձևավորվել են ընտրակաշառքի ազդեցությամբ։ Միաժամանակ, «Քաղաքացիական պայմանագրի» ներկայացուցիչը Սահմանադրական դատարանում երեկ պնդել է, որ խախտումները, այդ թվում՝ ընտրակաշառքը, չեն ունեցել այնպիսի ազդեցություն, որ ազդեին ընտրությունների արդյունքների վրա։ Խնդրում եմ հստակ պատասխանել՝ ինչպե՞ս կարող են միաժամանակ ճիշտ լինել երկու պնդումները, որ որոշ ուժերի ստացած քվեները ընտրակաշառքի արդյունք են, բայց ընտրությունների ընդհանուր արդյունքը լիարժեք արտացոլում է ժողովրդի ազատ և իրական նախընտրությունը»։

Հարցին արձագանքեց ՔՊ ներկայացուցիչ, արդարադատության նախարար Սրբուհի Գալյանը։ Նրա խոսքով՝ վարչապետը երբևէ չի ասել, որ այդ դատողությունների արդյունքում ընտրությունների վերջնարդյունքը պետք է դրվի կասկածի տակ։

«Այն, ինչ ասվել է, վերաբերել է ընտրակաշառքի դեպքերին և հանդիսացել է քաղաքական գնահատական, ինչը չի բացառում և հակառակը՝ չպետք է բացառի վարույթ իրականացնող մարմինների կողմից տրվելիք գնահատականը։ Ես երեկ շատ երկար խոսեցի այն թեստի մասին, որը սահմանում է Վենետիկի հանձնաժողովը, ինչպես նաև դրան անդրադարձ էր կատարվել Սահմանադրական դատարանի՝ իմ կողմից նշված որոշումներում, որ ընտրությունների արդյունքն անվավեր ճանաչելը բացառիկ միջոց է և դա չի կարող կապվել մեկ կամ մի քանի խախտումների հետ։ Դրա համար պետք է ծանրակշիռ պատճառ։

Մեր պնդումն այն է, որ տեղի ունեցած դեպքերը այն աստիճան ազդեցություն չեն ունեցել ընտրությունների արդյունքի վրա, որ մենք մի կողմ թողնենք այն քաղաքացիների քվեները, որոնք տրվել են ազատ ու արդար ընտրությունների կազմակերպման համատեքստում, և ասենք, որ ընտրություններն անվավեր են։ Միևնույն ժամանակ, կրկին ուզում եմ շեշտադրել՝ այն արատավոր երևույթները, որոնք տեղի են ունեցել պրոցեսի ընթացքում, պետք է արժանանան ամենախիստ քրեաիրավական գնահատականի»,-նշել է Գալյանը։

Մանրամասները՝ տեսանյութում։