ԴՕԿ-ը Դանիել Իոաննիսյանին վկայի կարգավիճակով ՍԴ հրավիրելու միջնորդություն ներկայացրեց․ ՏԵՍԱՆՅՈՒԹ

Հունիսի 7-ի արդյունքները Սահմանադրական դատարանում վիճարկող «Դեմոկրատիա, օրենք, կարգապահություն» (ԴՕԿ) կուսակցության ներկայացուցիչ Տարոն Բաղդասարյանը դատարանում հայտնեց, որ ուժը դիմումից բացի 2 միջնորդություն է ուզում ներկայացնել։

Նրա խոսքով՝ հունիսի 11-ին տեղի ունեցած մամուլի ասուլիսի ժամանակ վարչապետ Նիկոլ Փաշինյանը իր համապատասխան ելույթում նշել է, որ ընդհանուր առմամբ չի ընդունել այս ընտրությունների լեգիտիմությունը և նշել է, որ «Քաղաքացիական պայմանագիրը» ստացել է 100%-ով օրգանիկ քվե, այնինչ մյուս ուժերը ստացել են 100%-ով ընտրակաշառքով քվե՝ առնվազն մինչև այն շեմը։

«Նշվածի կապակցությամբ ցանկություն կար վերջինիս ներկայացնելու որպես վկա, որովհետև անհասկանալի էր, թե վերջինս ինչ տեղեկությունների հիման վրա է նշել, որ առկա է համապատասխան տեղեկատվությունը, և այդ ամենը ընտրակաշառքի արդյունքում է տեղի ունեցել։ Սակայն մինչ այդ մեր կողմից համապատասխան դիմում է ներկայացվել վերջինիս, որպեսզի պարզվի՝ կա՞ տեղեկատվություն, թե այդ տվյալները ինչ հանգամանքներում են վերջինիս հայտնի դարձել։

Ի պատասխան սրա՝ վարչապետի աշխատակազմը պատասխան գրություն է ուղարկել «Դեմոկրատիա, օրենք, կարգապահություն» (ԴՕԿ) կուսակցության ներկայացուցիչ, փաստաբան Լևոն Բաղդասարյանին, որով նշել է գրությունը, ինչպես նաև վերջինիս կողմից նշված համապատասխան միջնորդությունը, որը ուղղված է եղել Հայաստանի Հանրապետության [Սահմանադրական դատարանի] նախագահին։ Այս ապացույցները, հարգելի՛ նախագահող, եթե թույլ կտաք, ներկայացնենք դատարանին, ինչպես նաև մյուս կողմին»,-սա, ըստ Բաղդասարյանի, ԴՕԿ-ի առաջին միջնորդությունն էր, փաստաթղթերը գործի նյութերին կցելը։

2-րդ միջնորդությունը վերաբերում էր Դանիել Իոաննիսյանին որպես վկա ՍԴ հրավիրելուն։

«Մասնավորապես հունիսի 12-ին Պետրոս Ղազարյանին տրված հարցազրույցում «Իրազեկ քաղաքացիների միավորում» հասարակական կազմակերպության ծրագրերի համակարգող, անկախ դիտորդական առաքելության ներկայացուցիչ Դանիել Իոաննիսյանի հրապարակային հարցազրույցի ընթացքում վերջինս ընտրակաշառքների վերաբերյալ տեղեկություններ է հայտնում, որոնք էականորեն տարբերվում են Հակակոռուպցիոն կոմիտեի կողմից ներկայացված և հրապարակված տեղեկություններից։ Մասնավորապես, վերջինս նշել է, որ ընտրակաշառքների զանգվածային բնույթը կազմել է 100-150 հազար դեպք, և ընտրակաշառքների արդյունքում ստացված քվեները՝ մոտավորապես 6-7%-ից մինչև 10%-ը, եղել են ընտրակաշառքի ազդեցության տակ։ Հակակոռուպցիոն կոմիտեն 0.5%-ից 5% բացահայտման ցուցանիշ է ապահովել, և այս հարցազրույցից մեզ պարզ է դառնում, որ վերջինիս հայտնի են որոշակի տեղեկություններ, որոնք մեր դիրքորոշմամբ կարող են էական ազդեցություն ունենալ սույն գործընթացի նկատմամբ։

Եթե վերջինիս հայտնի է, որ այդ դեպքերը 100-150 հազար են, կամ ընտրությունների արդյունքների 10%-ը ընտրակաշառքի արդյունքում է տեղի ունեցել, ապա նման պայմաններում սա ևս մեկ փաստ է, որի շրջանակներում կարող ենք պնդել, որ այս ընտրությունների իրական արդյունքը մենք չունենք։ Նշվածով պայմանավորված՝ որպես վկա խնդրում եմ հրավիրել և հարցաքննել Դանիել Իոաննիսյանին»,-ասաց նա։

Մանրամասները՝ տեսանյութում։