Իսրայելի ԱԳ նախարարը նախատեսում է կառավարությանը առաջարկել Հայոց ցեղասպանությունը ճանաչելու բանաձև

Իսրայելի ԱԳ նախարար նախարար Գիդեոն Սաարը կիրակի օրը նախատեսում է կառավարությանն առաջարկել բանաձև՝ պաշտոնապես ճանաչելու Օսմանյան կայսրության վերջին տարիներին հայ ժողովրդի դեմ իրականացված ցեղասպանությունը, հայտնում է նրա գրասենյակը։ Քայլ, որը, անկասկած, կգրգռի դիվանագիտական ​​մրցակից Թուրքիային՝ գրում է The Times of Israel-ը։

Իսրայելը երկար ժամանակ խուսափում էր Հայոց ցեղասպանությունը ճանաչելուց՝ հարցի դիվանագիտական ​​զգայունության պատճառով, սակայն Թուրքիայի հետ հարաբերությունների կտրուկ վատթարացումը նախագահ Ռեջեփ Թայիփ Էրդողանի օրոք, որը բազմիցս մեղադրել է Իսրայելին Գազայում ցեղասպանության մեջ, վերջին տարիներին հանգեցրել է ճանաչման ուղղությամբ որոշակի քայլերի ձեռնարկմանը: Անցյալ օգոստոսին Իսրայելի  վարչապետ Բենիամին Նեթանյահուն առաջին անգամ հայտարարել էր, որ ճանաչում է ցեղասպանությունը:

«Չնայած լայնածավալ և անվիճելի պատմական փաստաթղթավորմանը՝ Հայոց ցեղասպանությունը շարունակում է մնալ ժխտման և նվազեցման կազմակերպված արշավի առարկա, ներառյալ պատմության դասագրքերի մանիպուլյատիվ վերաշարադրումը, հիմնականում Թուրքիայի կողմից։

Այս բարոյական և պատմական պարտավորության լույսի ներքո առաջարկվում է, որ Իսրայելի կառավարությունը ճանաչի Օսմանյան կայսրության վերջին տարիներին հայ ժողովրդի դեմ կատարված ցեղասպանությունը։ Բացի այդ, հաշվի առնելով Հայոց ցեղասպանության վայրագությունները մշուշոտելու, նվազագույնի հասցնելու կամ ժխտելու շարունակական փորձերը, առաջարկը կոչ է անում դատապարտել այդ իրադարձությունների պատմական ճշմարտությունը խեղաթյուրելու բոլոր ջանքերը»,- ասվում է տեքստում։

Նշենք, որ առաջարկի մասին X-ի իր միկրոբլոգում առանձին գրառում է արել նաև Իսրայելի ԱԳ նախարարը։

«Ես Իսրայելի կառավարությանը հաջորդ նիստում կներկայացնեմ Իսրայելի կառավարության կողմից Հայոց ցեղասպանության պաշտոնական ճանաչման վերաբերյալ առաջարկվող բանաձև։ Օսմանյան կայսրության վերջին տարիներին հայ ժողովրդի դեմ իրականացված ցեղասպանության ճանաչումը և՛ բարոյական, և՛ պատմական պարտականություն է։ Մենք պետք է նաև վճռականորեն դատապարտենք պատմական ճշմարտության ցանկացած ժխտում, նվազեցում կամ աղավաղում։ Բանաձևը հետագայում կներկայացվի Քնեսեթ՝ քվեարկության»,- հայտարարել է Սաարը։

Թարգմանությունը՝ Էմմա Չոբանյանի