15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Ռուսաստանը բանակցում է Ղազախստանից ԱԻ-92 բենզին ներմուծելու շուրջ
Քաղաքականություն
24.06.2026 | 22:43
Ռուսաստանը բանակցություններ է վարում Ղազախստանի հետ ԱԻ-92 տեսակի բենզինի շուրջ 50 հազար տոննա մատակարարման վերաբերյալ։ Այս մասին հունիսի 24-ին հայտնել է Reuters գործակալությունը՝ հղում անելով ոլորտի չորս աղբյուրների։
Գործակալության տվյալներով՝ բանակցություններն ընթանում են Ռուսաստանի մի շարք շրջաններում վառելիքի վաճառքի սահմանափակումների ֆոնին, որոնք պայմանավորված են ուկրաինական հարվածների հետևանքով ռուսական նավթավերամշակման գործարանների աշխատանքում առաջացած խնդիրներով։
Reuters-ը նշում է, որ Ռուսաստանում բենզինի արտադրությունը հունիսի վերջին տարեկան կտրվածքով նվազել է մոտ 25 տոկոսով։ Միաժամանակ աղբյուրները նշում են, որ Ղազախստանի վառելիքային արտադրական հնարավորությունները զգալիորեն զիջում են ռուսականին, ուստի հնարավոր մատակարարումները դժվար թե էական ազդեցություն ունենան ռուսական շուկայի վրա։
Ներկայում Ղազախստանում արձանագրվում է բենզինի ավելցուկ, սակայն հունիս-հուլիս ամիսներին Ատիրաուի նավթավերամշակման գործարանում նախատեսված տեխնիկական սպասարկման աշխատանքները կարող են կրճատել հասանելի պաշարները։
Ավելի վաղ Ղազախստանի էներգետիկայի նախարար Երլան Աքքենժենովը հայտարարել էր, որ պաշտոնական Աստանան Ռուսաստանից բենզինի մատակարարման վերաբերյալ պաշտոնական դիմումներ չի ստացել։ Ռուսաստանի էներգետիկայի նախարարությունը մինչ այժմ չի մեկնաբանել Reuters-ի հրապարակած տեղեկությունները։
Միևնույն ժամանակ, Ռուսաստանի Պետդումայի բյուջեի և հարկային հարցերի հանձնաժողովը առաջին ընթերցմամբ հավանություն է տվել կառավարության ներկայացրած փոփոխություններին, որոնք նախատեսում են պետական սուբսիդիաներ հատկացնել այն նավթային ընկերություններին, որոնք բենզին կգնեն արտերկրից։
Հունիսի 24-ի դրությամբ բենզինի և դիզելային վառելիքի վաճառքի սահմանափակումներ պաշտոնապես գործում են Ռուսաստանի 24 տարածաշրջաններում։
Ավելի վաղ հայտնել էինք, որ աշխարհում ամենաշատ նավթ ունեցող երկրների տասնյակում գնտվող Ռուսաստանի մի շարք շրջաններում բենզինի ու դիզվառելիքի դեֆիցիտ է։ Պատճառը ռուսական նավթավերամշակման գործարաններին և նավթաբազաներին ուկրաինական ԱԹՍ-ների հարվածներն են:
