Մոսկվան հուսով է՝ ՀՀ-ն կընտրի ԵՏՄ-ն․ Պեսկով

Հայաստանի ղեկավարությունը ներկայում գտնվում է խաչմերուկում։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է ՌԻԱ Նովոստին։

«Հիմա Հայաստանի ղեկավարությունը գտնվում է խաչմերուկում։ Հայաստանի ղեկավարությունը խոսում է զարգացման ուղու առաջիկա ընտրության մասին», – լրագրողներին ասել է Պեսկովը։

Նա պարզաբանել է, որ սա կարևոր պահ է Ռուսաստանի համար, քանի որ ՌԴ-ն և Հայաստանը դարերով հարևաններ են եղել, եղբայրական երկրներ։

«Հարյուրամյակների ընթացքում Ռուսաստանը և Հայաստանը հարևաններ են եղել, եղբայրական երկրներ։ Այս առումով մենք սերտորեն կապված ենք, մեր երկրում ապրում են բազմաթիվ հայեր, Հայաստանում ապրում են ռուսներ։ Մեզ միավորում է շատ հաջող ինտեգրացիոն գործընթացը։ Մենք համոզված ենք, որ այս ինտեգրացիոն գործընթացը, մասնավորապես՝ ԵՏՄ-ն, ամեն տարի զգալի տոկոս է կազմում Հայաստանի ՀՆԱ-ի աճի մեջ»,- նշել է նա։

Պեսկովը հավելել է, որ Մոսկվան հետաքրքրված է Երևանի հետ հետագա համագործակցությամբ։

«Մենք շատ ընդհանրություններ ունենք։ Մենք լուրջ ներդրող ենք Հայաստանում՝ որպես Ռուսաստան։ Հետևաբար, շատ բան կա անելու, և հարաբերությունները կշարունակեն զարգանալ»,- նշել է նա։

Ռուսաստանը հույս ունի, որ Երևանը, ի վերջո, ընտրություն կկատարի Եվրասիական տնտեսական միության (ԵՏՄ) օգտին, քանի որ «այս ինտեգրացիոն գործընթացը զգալիորեն ավելի շահավետ է, քան Հայաստանի հնարավոր անդամակցությունը ԵՄ-ին»։

Թարգմանությունը՝ Էմմա Չոբանյանի