14.06.2026 | 23:18
Գիշերվա կեսին գողացան ժողովրդի քվեն. Տոնոյանը` ԿԸՀ-ի որոշման մասին. ՏԵՍԱՆՅՈւԹ
Հայաստանի հետ Համաշխարհային բանկի համագործակցության շրջանակը 2019-2022թթ. համար լինելու է արտահանման խթանումը
Տնտեսություն
28.11.2018 | 16:22
Նոյեմբերի 27-ին ՀՀ փոխվարչապետի պաշտոնակատար Տիգրան Ավինյանն ընդունեց Համաշխարհային բանկի Հայաստանի գրասենյակի տնօրեն Սիլվի Բոսութղոյի գլխավորած պատվիրակությանը: Հանդիպմանը ներկա էին նաև Տնտեսական զարգացման ու ներդրումների նախարարի պաշտոնակատար Տիգրան Խաչատրյանը և Կապի, տրանսպորտի և տեղեկատվական տեխնոլոգիաների նախարարի պաշտոնակատար Հակոբ Արշակյանը:
Ողջունելով հյուրերին՝ Տիգրան Ավինյանը կարևորեց Համաշխարհային բանկի հետ համագործակցությունը՝ միտված տնտեսության զարգացմանը ու մրցունակության բարձրացմանը, ինչպես նաև ներդրումների ներգավվմանը:
Շնորհակալություն հայտնելով ընդունելության համար՝ Սիլվի Բոսութղոն նշեց, որ ողջունում են կառավարության հանձնառությունը հավակնոտ բարեփոխումներ իրականացնելու և տնտեսական առաջընթաց ապահովելու առումով, և այս գործընթացում Համաշխարհային բանկը լինելու է Հայաստանի կառավարության աջակիցն ու գործընկերը: Նա նաև հավելեց, որ շուտով Համաշխարհային բանկը քննարկելու է Հայաստանի հետ համագործակցության շրջանակը 2019-2022թթ. համար, որի հիմնասյուներից մեկն էլ լինելու է արտահանման խթանումը:
Հանդիպման ընթացքում քննարկվեց Համաշխարհային բանկի «Առևտրի խթանում և որակի ենթակառուցվածքներ» ծրագրի իրականացման ընթացքը: Ծրագիրը միտված է արտահանման խրախուսման, ներդրումների ներգրավման և որակի կառավարման ծառայությունների մատուցման բնագավառում ՀՀ կառավարության կարողությունների ամրապնդմանն ու հզորացմանը:
Զրուցակիցները համակարծիք էին, որ ծրագիրը պետք է նպաստի հայկական ընկերությունների արտադրանքի մրցունակության բարձրացմանը միջազգային շուկաներում, ինչպես նաև պետություն-մասնավոր գործընկերության ամրապնդմանը:
Փոխվարչապետի պաշտոնակատարը նաև նշեց, որ ծրագրի միջանկյալ վերանայման արդյունքում հատկապես մեծ ուշադրություն պետք է դարձնել տնտեսության բարձր տեխնոլոգիական ոլորտին ուղղվող ենթածրագրերին և դրանց քանակի ավելացմանը:
