Ղրիմում բենզինի վաճառքն ամբողջությամբ դադարեցվել է

Ռուսաստանի կողմից բռնակցված Ղրիմի բոլոր բենզալցակայաններում ամբողջությամբ դադարեցվել է վառելիքի վաճառքը բնակչությանը՝ ինչպես ազատ վաճառքով, այնպես էլ կտրոններով։ Այս մասին հունիսի 21-ին Telegram-ում հայտարարել է ՌԴ-ի կողմից նշանակված թերակղզու «ղեկավար» Սերգեյ Ակսյոնովը։

Նրա խոսքով՝ վառելիք կտրամադրվի միայն պետական ծառայություններին, որոնք ապահովում են Ղրիմի կենսագործունեությունն ու անվտանգությունը։ Բենզինի վաճառքը դադարեցվել է հունիսի 21-ի առավոտյան ժամը 09:00-ից։ Հետագա որոշումների մասին, ըստ Ակսյոնովի, կհայտարարվի լրացուցիչ։

Ավելի վաղ նա հայտնել էր, որ Կերչի թերակղզու վրա անօդաչու թռչող սարքերի հարձակման հետևանքով զոհվել է 4, վիրավորվել՝ 28 մարդ։

Ղրիմը բենզինի սուր պակասի առաջին դեպքին բախվել էր դեռ մայիսի վերջին, երբ Ուկրաինայի զինված ուժերի հարվածների հետևանքով վնասվել էին P-280 մայրուղով Ղրիմ մատակարարումներ իրականացնող բենզատարներն ու բեռնատարները։

Հունիսի 6-ից Սևաստոպոլում բենզին ստանալու համար ներդրվել էին QR կոդերով կտրոններ, որոնց միջոցով մեկ անձը կարող էր գնել առավելագույնը 20 լիտր վառելիք։ Կտրոն ստանալ հնարավոր էր շաբաթը միայն մեկ անգամ և միայն ռուսական Max պետական մեսենջերի միջոցով։

Ուկրաինայի նախագահ Վլադիմիր Զելենսկին հաստատել է, որ հունիսի 21-ի գիշերը Ուկրաինան հեռահար հարվածներ է հասցրել ռուսական ռազմական լոգիստիկային, նավթային ոլորտի օբյեկտներին և հակաօդային պաշտպանության համակարգերին՝ Ղրիմի կամրջի երկու կողմերում։

«Սա արդար պատասխան է մեր ժողովրդի դեմ իրականացվող ռուսական դաժան հարվածներին»,- գրել է նա Facebook-ում։

Զելենսկիի խոսքով՝ թիրախավորվել են նաև Կրասնոդարի երկրամասում նավթի փոխադրման ենթակառուցվածքները, բռնակցված Կերչի նավթաբազան, S-400 համակարգերի կազմի մեջ մտնող չորս ռադիոլոկացիոն կայան և «Պանցիր» հակաօդային պաշտպանության երկու համալիր։