14.09.2026 | 14:48
Անկարան հայտնել է, որ Թուրքիայից Հայաստան արտահանումը հունվար-օգոստոսին կազմել է 1 մլն 336 հազար դոլար
Զորավարժություն Երևանում, դժգոհություն՝ Մոսկվայում. ինչո՞ւ է աղմկում Զախարովան. ԱՉՔԻ ՏԱԿ
Քաղաքականություն
19.06.2026 | 23:10
Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան քննադատել է Հայաստանում անցկացվող «Արծիվ գործընկեր-2026» միջազգային զորավարժությունը՝ հայտարարելով, թե դրա ընթացքում հայ զինծառայողներին «սովորեցնելու են պատերազմել Ռուսաստանի դեմ»։ Նրա խոսքով՝ նման նախաձեռնությունները տեղավորվում են Հայաստանը Ռուսաստանից հեռացնելու՝ ՆԱՏՕ-ի քաղաքականության շրջանակում։
Սակայն ի՞նչ է իրականում «Արծիվ գործընկեր» զորավարժությունը։
«Արծիվ գործընկեր» միջազգային զորավարժությունն անցկացվում է Հայաստանում 2023 թվականից։ Այս տարի այն անցկացվում է արդեն չորրորդ անգամ։ Եթե նախորդ տարիներին զորավարժությանը մասնակցում էին միայն Հայաստանի և Միացյալ Նահանգների զինծառայողները, ապա այս տարի նրանց միացել են նաև Ֆրանսիայի և Հունաստանի զինվորականները։
ՀՀ Պաշտպանության նախարարության և Հայաստանում ԱՄՆ դեսպանության փոխանցմամբ՝ զորավարժության նպատակն է բարձրացնել խաղաղապահ ստորաբաժանումների պատրաստվածությունը և զարգացնել միջազգային գործընկերների հետ համագործակցության ու փորձի փոխանակման կարողությունները։
Այսինքն՝ խոսքը խաղաղապահ առաքելությունների մասին է, ոչ թե ռազմական գործողությունների պատրաստվածության կամ Ռուսաստանի դեմ պատերազմի մշակման։
Կարևոր է նաև նշել, որ «Արծիվ գործընկեր»-ը ՆԱՏՕ-ի կողմից կազմակերպվող կամ իրականացվող զորավարժություն չէ։ Այն ներառված չէ դաշինքի պաշտոնական խոշոր զորավարժությունների ցանկում։ Զորավարժությունը կազմակերպվում է Հայաստանի և ՆԱՏՕ-ի անդամ առանձին պետությունների համագործակցության շրջանակում, այլ ոչ թե ՆԱՏՕ-ի կողմից։
Ռուսաստանի քննադատությունը, սակայն, նոր չէ։ Դեռևս 2023 թվականին Հայաստանի և ԱՄՆ-ի համատեղ զորավարժություններին անդրադարձել էր Ռուսաստանի նախագահի մամուլի քարտուղար Դմիտրի Պեսկովը՝ նշելով, որ ՀԱՊԿ զորավարժություններից հրաժարվելն ու ԱՄՆ-ի հետ համատեղ վարժանքներ անցկացնելը «խորը վերլուծության կարիք ունեն»։
Իսկ 2024 թվականին Մարիա Զախարովան Հայաստանի տարածքում անցկացվող հայ-ամերիկյան համատեղ զորավարժությունը քննադատել էր՝ հայտարարելով, թե նման «արծվային գործընկերությունները» միշտ վատ ավարտ են ունենում։
Հայաստանի՝ ՀԱՊԿ-ում մասնակցությունը սառեցնելու ֆոնին «Արծիվ գործընկեր» զորավարժությունը Ռուսաստանում ստացել է քաղաքական հնչեղություն։ Սակայն Զախարովայի այն պնդումը, թե զորավարժության ընթացքում «հայ զինծառայողներին պատրաստում են Ռուսաստանի դեմ պատերազմի», մանիպուլյատիվ է։
Մանրամասները՝ տեսանյութում։
Անի Թամրազյան
