ԲԱՆԱՎԵՃ․ ՌԴ-ի պատժամիջոցները՝ ՀՀ-ի դեմ․ ԵՄ-ի աջակցությամբ կհաղթահարվի՞ ճգնաժամը ․ ՏԵՍԱՆՅՈՒԹ

Եվրոպական հանձնաժողովը Հայաստանին հատկացրել է 34 մլն եվրո՝ մասնավոր հատվածի վրա Ռուսաստանի կողմից առևտրային սահմանափակումների հետևանքները մեղմելու նպատակով։ Սա ԵՄ-ի հայտարարած աջակցության փաթեթի 1-ին մասնաբաժինն է և ուղղված է Հայաստանի տնտեսական դիմակայունության ամրապնդմանը, առևտրի դյուրացմանն ու հայկական արտադրողների համար շուկաների մատչելիության ընդլայնմանը։ Միաժամանակ, Հայաստանն ու Եվրամիությունը ինտենսիվ քննարկումների մեջ են՝ դեպի եվրոպական շուկա հայկական ապրանքներն արագ և առանց բյուրոկրատական քաշքշուկների արտահանելու նպատակով։  

Վերջին ամիսներին հայկական տնտեսությունը բախվում է մարտահրավերների՝ պայմանավորված ՌԴ արտահանվող հայաստանյան ապրանքների նկատմամբ կիրառվող սահմանափակումներով։ «Ռոսսելխոզնադզորը» պնդում է, թե սա քաղաքական որոշման արդյունք չէ, այլ պարզապես՝ ՀՀ-ից արտահանվող ապրանքները չեն բավարարում բուսասանիտարական և ԵՏՄ-ի կանոնակարգերով սահմանված որակական ստանդարտներին։ Սակայն ռուսական կողմը չի բացատրել՝ ինչո՞ւ տասնյակից ավելի ապրանքների ներկրումն ու ՌԴ-ի տարածքով տեղափոխումն արգելվեցին՝ հենց հունիսի 7-ի ԱԺ ընտրությունների օրերին։ Առավել ևս չեն բացատրել՝ ինչո՞ւ տնտեսական սահմանափակումները կիրառվեցին՝ զուգահեռ Վլադիմիր Պուտինի այն առաջարկին, որ ՀՀ-ն պետք է հանրաքվե անցկացնի՝ ԵՄ-ին կամ ԵՏՄ-ին անդամակցելու հարցով։ 

Factor TV-ում քննարկում ենք հրավիրել այս թեմայով, որին մասնակցում են Հայկազ Ֆանյանը՝ տնտեսագետ, «Աքսես» վերլուծական կենտրոնի ղեկավար, Հայկ Գևորգյանը՝ տնտեսական մեկնաբան, ՀՀ ԱԺ ՔՊ խմբակցության նախկին պատգամավոր, Սոս Խաչիկյանը՝ տնտեսագետ, Արման Ղուկասյանը՝ Հանուն սոցիալական արդարության կուսակցության նախագահ, Դիաննա Կարապետյանը՝ Ադրբեջանի հարցերով վերլուծաբան։

Հաղորդումն ամբողջությամբ՝ տեսանյութում։

Ռոբերտ Անանյան