10.10.2026 | 18:45
Քննարկվել են Հայաստան–Կորեա համագործակցությանն առնչվող հարցեր
ԴՕԿ կուսակցությունը ՍԴ-ում վիճարկում է ԱԺ ընտրությունների արդյունքներով ընդունված որոշումը
Քաղաքականություն
19.06.2026 | 16:25
«Դեմոկրատիա, օրենք, կարգապահություն» կուսակցության ներկայացուցիչը հունիսի 19-ին դիմում է ներկայացրել Սահմանադրական դատարան՝ վիճարկելով Ազգային ժողովի հունիսի 7-ի ընտրությունների արդյունքներով ընդունված որոշումը։ ՍԴ-ն դիմումը մուտքագրվելուց հետո երկօրյա ժամկետում պետք է որոշի դրա ընդունելիության հարցը, իսկ վարույթ ընդունվելու դեպքում գործը պետք է քննի և որոշում կայացնի ոչ ուշ, քան 15 օրվա ընթացքում։
«2026 թվականի հունիսի 19-ին «ԴԵՄՈԿՐԱՏԻԱ ՕՐԵՆՔ ԿԱՐԳԱՊԱՀՈՒԹՅՈՒՆ» կուսակցության ներկայացուցիչը դիմում է ներկայացրել Սահմանադրական դատարան, որով վիճարկվում է Հայաստանի Հանրապետության Ազգային ժողովի 2026 թվականի հունիսի 7-ի ընտրությունների արդյունքներով ընդունված որոշումը:
Սահմանադրական դատարանը դիմումը մուտքագրվելուց հետո երկօրյա ժամկետում աշխատակարգային նիստում որոշում է դիմումի ընդունելիության հարցը:
Դիմումը վարույթ ընդունվելու դեպքում նշանակվում է զեկուցող դատավոր, որը գործը նախապատրաստում է դատաքննության: Ազգային ժողովի ընտրությունների արդյունքների վերաբերյալ վեճերով դատաքննությունն իրականացվում է բանավոր ընթացակարգով: Սահմանադրական դատարանը պարտավոր է գործը քննել և որոշում ընդունել դիմումի մուտքագրման օրվանից ոչ ուշ, քան 15 օր հետո։
Սույն դիմումի կարգավիճակի վերաբերյալ ընթացիկ տեղեկատվությանը կարող եք հետևել ՍԴ պաշտոնական կայքում և Ֆեյսբուք սոցիալական հարթակի ՍԴ պաշտոնական էջում»,- ասված է հաղորդագրությունում։
