03.08.2026 | 14:30
Բրազիլիայում 15-ամյա ֆուտբոլիստ է սպանվել հանդիպման ժամանակ
Հայաստանը Airbus-ի հետ վեց H145 ուղղաթիռների ձեռքբերման պայմանագիր է ստորագրել
Քաղաքականություն
19.06.2026 | 10:43
Airbus Helicopters ընկերությունն ու Հայաստանի Հանրապետությունը պայմանագիր են ստորագրել վեց H145 ուղղաթիռների ձեռքբերման վերաբերյալ։ Այս մասին հայտնում է ընկերությունը։ Նշվում է, որ համաձայնագիրը, որը վերջնականացվել էր Ֆրանսիայի նախագահ Էմանուել Մակրոնի՝ Երևան կատարած պետական այցի ընթացքում, վերջերս ուժի մեջ է մտել՝ նշանավորելով Ֆրանսիայի և Հայաստանի միջև երկկողմ կապերի ամրապնդման կարևորագույն փուլը։
Բազմաֆունկցիոնալ H145 ուղղաթիռները կօգտագործվեն տրանսպորտային առաքելությունների համար: Այս ձեռքբերումը ներկայացնում է Հայաստանի առաջին պայմանագիրը Airbus Helicopters-ի հետ, որն ազդարարում է երկրի ուղղաթիռային հնարավորությունների արդիականացումը՝ իր դասի ամենաբազմակողմանի և հուսալի հարթակներից մեկով։
«Մեծ պատիվ է պաշտոնապես ողջունել Հայաստանի Հանրապետությանը Airbus Helicopters ընտանիքում։ Այս առաջին պայմանագիրը մեր ընկերության և Հայաստանի միջև աճող գործընկերության վկայությունն է, և մենք հպարտ ենք աջակցել ժողովրդին իր օդային կարողությունների արդիականացման գործում։ H145-ը Հայաստանի իշխանություններին կապահովի իրենց ամենախստապահանջ տրանսպորտային առաքելության պահանջների համար անհրաժեշտ ճկունությունն ու հուսալիությունը։ Մենք անհամբեր սպասում ենք երկարատև և արդյունավետ համագործակցության՝ մեր գործընկերությունը զարգացնելու առաջիկա տարիներին»,- ասել է Արևելյան Եվրոպայի, Կենտրոնական Ասիայի և Կովկասի գծով փոխնախագահն Լյուդովիկ Բուիստոնը։
Նշվում է, որ H145-ը հայտնի է բարձր կատարողական արդյունքով, մասնավորապես, բարձրլեռնային և շոգ միջավայրերում, ինչն այն դարձնում է կատարյալ տարբերակ Հայաստանի բազմազան և լեռնային աշխարհագրության համար: H145-ի հինգ շեղբով տարբերակն ապահովում է ավելի մեծ բեռնվածություն, ավելի սահուն թռիչքի փորձ և պարզեցված սպասարկման ռեժիմ։
Ընկերության հայտարարության մեջ ասվում է, որ ընդհանուր առմամբ, շահագործման մեջ են H145 ընտանիքի ավելի քան 1800 ուղղաթիռներ, որոնք գրանցել են ավելի քան 8,5 միլիոն թռիչքային ժամ: Երկու Safran Arriel 2E շարժիչներով H145-ը հագեցած է լիարժեք թվային շարժիչի կառավարման (FADEC) և Helionix թվային ավիոնիկայով: Այն ներառում է բարձր արդյունավետությամբ քառառանցք ավտոպիլոտ, որը մեծացնում է անվտանգությունը և նվազեցնում օդաչուի աշխատանքային ծանրաբեռնվածությունը։ Հատկապես ցածր ակուստիկ հետքը H145-ը դարձնում է իր դասի ամենաանաղմուկ ուղղաթիռը, միաժամանակ, դրա CO2 արտանետումներն ամենացածրն են մրցակիցների շրջանում։
Թարգմանությունը՝ Էմմա Չոբանյանի
