Անցումային արդարադատության ճանապարհը շատ ցավոտ է․ Արարատ Միրզոյան․ ՏԵՍԱՆՅՈՒԹ

Առաջին փոխվարչապետի պաշտոնակատար Արարատ Միրզոյանի խոսքով՝  հեղափոխությունից առաջ Հայաստանում զանգվածաբար խախտվել են մարդկանց մի շարք իրավունքներ․ կեղծվել են ընտրությունների արդյունքներ, խախտվել են մարդկանց տնտեսական իրավունքները, եղել են արհեստական տնտեսական մենաշնորհներ և այլն, և հիմա այս ամենն արձանագրելուց հետո պետք է հասկանալ, թե անցումային արդարադատության՝ աշխարհում  ճանաչում գտած գործիքակազմը որքանո՞վ է կիրառելի Հայաստանի համար։

Այս մասին այսօր «Անցումային արդարադատության մեխանիզմների  ներդրման հնարավորությունը ՀՀ-ում՝ միջազգային փորձի լույսի ներքո» թեմայով քննարկման ժամանակ ասաց Արարատ Միրզոյանը՝ ընդգծելով, որ անցումային արդարադատության վերջնական իմաստը ճշմարտության ամրագրումն է և ապագային միտված երկխոսությունը՝ հաշտեցումը։

«Այդ խնդիրների թվում կարող է լինել նաև այն շեմի որոշումը, որից ներքև պետք է լինի երկխոսություն և հաշտություն, իսկ այդ շեմից վերև՝ քրեական գործեր։ Այս ամեն ինչը պետք է շատ հանգամանալից ուսումնասիրվի, որից հետո նոր կկարողանանք հասկանալ՝ գնալու ենք այդ ճանապարհով, թե՞ ոչ»,- ասաց առաջին փոխվարչապետի պաշտոնակատարը։

Վերջինիս խոսքով՝ անցումային արդարադատության ճանապարհը շատ ցավոտ է, որովհետև երկխոսությունից և հաշտեցումից առաջ պետք է լինի մեղքի, հանցանքի ամրագրումն ու մեղավորի անուն-ազգանունի որոշումը, իսկ  այդ ժամանաակ, բնականաբար, կլինեն մարդիկ, որոնք դրա հետ չեն համաձայնի, հետևաբար,  սա կարճ և ցավոտ ճանապարհ է լինելու։

Մանրամասները՝ տեսանյութում։