05.09.2026 | 22:55
«Ինտերը» 0:2-ից հետո կամային հաղթանակ է տարել «Նապոլիի» նկատմամբ. ՏԵՍԱՆՅՈՒԹ
Ռուսաստանը հրթիռների արտադրության հարցում ապավինում է Ադրբեջանի կառավարության կողմից ղեկավարվող ձեռնարկությանը․ United24-ի հետաքննությունը
Քաղաքականություն
18.06.2026 | 20:24
Ուկրաինայի իշխանության կողմից կառավարվող United24 հարթակը հայտնել է, որ իր ստացած ներքին փաստաթղթերի համաձայն՝ «Ադրբեջանում կառավարության կողմից կառավարվող արտադրողը ներգրավված է եղել ռուսական ռազմարդյունաբերական արտադրական շղթայում»՝ ստեղծելով կառավարվող հրթիռներ, որոնք Ռուսաստանի կողմից օգտագործվում են Ուկրաինայի դեմ լայնածավալ պատերազմում, գրում է OC Media-ն։
United24-ի հետաքննությունը պարզել է, որ Ռուսաստանի Kh-29TE օդ-երկիր դասի կառավարվող հրթիռները հիմնված են արտադրական շղթայի վրա, որը կազմված է Ռուսաստանի Պերմի վառոդի գործարանից, Ադրբեջանի «Իգլիմ» գիտաարտադրական ձեռնարկությունից, որը գտնվում է Ադրբեջանի պաշտպանության նախարարության իրավասության ներքո, և հրթիռներ արտադրող ռուսական Vympel ընկերությունից։
Գործընթացը սկսվում է Պերմի գործարանում, որը United24-ը նկարագրում է որպես «ռուսական ռազմարդյունաբերական շղթայի կարևոր հանգույց, որը մեծ մասշտաբով պայթուցիկ նյութեր և վառոդ է արտադրում ռազմական նպատակներով»։ Ըստ լրատվականի՝ գործարանը պետական սեփականություն է, ինչը նշանակում է, որ Ռուսաստանի կառավարությունը վերահսկում է դրա մասնակցությամբ իրականացվող ամբողջ առևտուրը։ Ընկերությունը նաև ենթարկվում է պատժամիջոցների ԵՄ-ի, ԱՄՆ-ի, Մեծ Բրիտանիայի, Կանադայի, Ավստրալիայի, Շվեյցարիայի, Ճապոնիայի և Ուկրաինայի կողմից։
Այստեղից անհայտ արտադրանքը, որը հայտնի է միայն որպես 9R-1036, ուղարկվում է Իգլիմ, որտեղ այն տեղադրվում է 63M նշանակության բաղադրիչի մեջ, որից հետո ապրանքը հետ է ուղարկվում Պերմ, այնտեղից ուղարկվում է Vympel՝ պատժամիջոցների տակ գտնվող մեկ այլ ռուսական ընկերություն, որն արտադրում է «օդ-օդ և օդ-երկիր դասի կառավարվող հրթիռներ, արձակման կայանքներ և կատապուլտներ, ռումբերի և տորպեդոների պահոցներ, ինչպես նաև պասիվ խլացման սարքեր՝ ինքնաթիռների և ուղղաթիռների պաշտպանության համար»:
«Իգլիմն արտադրական գործընթացի կարևորագույն միջանկյալ մասն է»,- ընդգծում է United24-ը գործընթացի վերաբերյալ իր պարզաբանման մեջ։
Ադրբեջանի մայրաքաղաք Բաքվում գտնվող «Իգլիմ»-ը հիմնադրվել է 1961 թվականին՝ որպես օդորակիչների արտադրության գործարան, իսկ ավելի ուշ դարձել է ավիացիոն ձեռնարկություն, պարզել է United24-ը։ 2006 թվականին այն անցել է պետական վերահսկողության տակ՝ որպես գիտական և արտադրական ձեռնարկություն, նրանց պաշտոնական կառավարական էջը, կարծես, այլևս չի գործում։
Այսօր այն պատկանում է «Azersilah Defense Industry Holding» ՓԲԸ-ին, որն իրեն նկարագրում է որպես «Ադրբեջանի ժամանակակից պաշտպանական կարողությունների ձևավորման գործում ռազմավարական դերակատարում ունեցող ընկերություն»։
«Հուսալի, նորարարական և բարձր ճշգրտության պաշտպանական տեխնոլոգիաների մշակման միջոցով մենք նպաստում ենք ազգային և համաշխարհային անվտանգությանը՝ մատակարարելով համակարգեր, որոնք պատասխանատվությամբ, ճշգրտությամբ և հետևողականությամբ բավարարում են այսօրվա գործառնական պահանջները»,- ասվում է նրանց այտարարության մեջ։
Ստացված ներքին փաստաթղթերին հղում անելով՝ United24-ն ընդգծում է, որ այս արտադրական շղթան սկսվել է Ռուսաստանի կողմից Ուկրաինա լիարժեք ներխուժումից առաջ, սակայն մատակարարման ծավալը, կարծես, աճել է 2023 թվականին։
Ըստ հարթակի՝ հետաքննությունը բացահայտում է, որ չնայած պատժամիջոցներին՝ Ադրբեջանի պաշտպանական արդյունաբերությունը «մնացել է կապված Ռուսաստանի ռազմական արտադրության շղթաների հետ»։
«Չնայած Ադրբեջանը հրապարակայնորեն չի հայտարարում Ռուսաստանի պատերազմին աջակցության մասին՝ շարունակական համագործակցությունը հարցեր է առաջացնում գործող սահմանափակումների վերահսկողության և կիրառման վերաբերյալ»,- գրել է United24-ը։
United24-ը նշում է, որ մեկնաբանություն ստանալու համար դիմել է և՛ «Իգլիմ»-ին, և՛ Azersilah-ին, սակայն չորեքշաբթի առավոտյան հրապարակման պահի դրությամբ՝ որևէ պատասխան չի ստացել։
Թարգմանությունը՝ Էմմա Չոբանյանի
