09.07.2026 | 21:27
Սոֆիա Բաղրամյանը՝ Եվրոպայի մինչև 10 տարեկանների կայծակնային շախմատի բրոնզե մեդալակիր
«Հայ զինվորականներին կսովորեցնեն կռվել Ռուսաստանի դեմ»․ Զախարովան մեկնաբանել է ՀՀ-ում անցկացվող «Արծիվ գործընկեր 2026» զորավարժությունները
Քաղաքականություն
18.06.2026 | 19:18
ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է Հայաստանում ընթացող «Արծիվ գործընկեր 2026» զորավարժությունները, որին մասնակցում են ՀՀ ԶՈՒ խաղաղապահ բրիգադի (250 մասնակից), Եվրոպայում և Աֆրիկայում ԱՄՆ ցամաքային զորքերի ու Կանզասի ազգային գվարդիայի (58 մասնակից), Ֆրանսիայի (24 մասնակից), Հունաստանի (11 մասնակից) զինված ուժերի զինծառայողները:
«ՆԱՏՕ-ի երկրների հետ նման զորավարժությունները, ափսոսանքից բացի, ոչինչ չեն առաջացնում։ Առանձին անհանգստություն է առաջացնում այն, որ նման վարժական ծրագրերը Հայաստանի տարածքում ձեռք են բերում համակարգային բնույթ։ Դրանք անցկացվում են ամեն տարի 2023 թվականից ի վեր»,- հայտարարել է Զախարովան՝ խոսելով նաև ՀԱՊԿ-ում Հայաստանի անդամակցության սառեցման և ՀՀ վարչապետ Նիկոլ Փաշինյանի հայտարարության մասին, որ ՀԱՊԿ-ը ՀՀ-ից դուրս է եկել։
Ըստ նրա՝ «ինչ խաղաղարար առաջադրանք էլ հռչակվի, ՆԱՏՕ-ականների հիմնական նպատակն ակնհայտ է․ հանրապետության հեռացումն ավանդական դաշնակցից՝ ի դեմս ՌԴ-ի»։
«Ոչ ոքի համար գաղտնիք չէ, որ նման վարժանքների ընթացքում մեր երկիրը ներկայացվում է որպես հնարավոր հակառակորդ։ Հայ զինվորականներին կսովորեցնեն կռվել Ռուսաստանի դեմ։ Ժամանակին նման բան հնարավոր չէր լինի երևակայել, այդ թվում՝ այն պատճառով, որ ՌԴ-ում մեծ թվով էթնիկ հայեր են ապրում»,- ասել է Զախարովան։
Նրա պնդմամբ՝ որոշ ժամանակ առաջ դժվար էր նման բան պատկերացնել, բայց հիմա «դա տեղավորվում է Հայաստանի բարձրագույն ղեկավարության հայտարարություններում, որ Հայաստանը Մոսկվայի դաշնակիցը չէ Ուկրաինայում հարցում։
«Այդ ազդանշաններն Արևմուտքում հաշվի են առնում, եզրակացություններ անում ու սկսում են Երևանին ներքաշել ՌԴ-ի հետ հակադրության մեջ»,- հայտարարել է ռուսաստանցի պաշտոնյան։
Նա նաև հավելել է՝ այդ զորավարժությունները ոչինչ չեն տա Հարավային Կովկասի կայունությանը, այլ նոր աշխարհաքաղաքական բաժանարարներ ու սպառնալիքներ կստեղծեն։
Թարգմանությունը՝ Էմմա Չոբանյանի
