Մեծ Բրիտանիան հայտարարել է Ռուսաստանի «ստվերային նավատորմի» դեմ նոր պատժամիջոցների մասին

Մեծ Բրիտանիան կդառնա առաջին երկիրը, որը հեղուկ բնական գազի նավերը կներառի Ռուսաստանի դեմ նոր պատժամիջոցների փաթեթում, հայտնում է բրիտանական կառավարության կայքը։ Նոր պատժամիջոցների փաթեթը կներկայացվի այսօր՝ հունիսի 16-ին, Ֆրանսիայի Էվիան քաղաքում «Մեծ յոթնյակի» (G7) գագաթնաժողովի շրջանակում, գրում է The Insider-ը։

Նոր պատժամիջոցների փաթեթը կուղղվի Ռուսաստանի «ստվերային նավատորմի», պատժամիջոցներից խուսափելու սխեմաների և ռուսական  բանակի համար արևմտյան տեխնոլոգիաների ձեռքբերման հետ կապված ցանցերի դեմ: Նոր սահմանափակումների ներդրումից հետո բրիտանական պատժամիջոցների ցանկում հայտնված Ռուսաստանի «ստվերային նավատորմի» և հեղուկ բնական գազի արտահանման հետ կապված նավերի թիվը կգերազանցի 600-ը:

Ավելի ուշ Բրիտանիայի կառավարությունը պաշտոնապես հայտարարել է պատժամիջոցների մասին։ Դրանք ուղղված են «Ռուսաստանի ստվերային նավատորմի, ռազմական գնումների և պատժամիջոցները շրջանցելու համար օգտագործվող ֆինանսական ցանցերի դեմ»։ Մասնավորապես, Լոնդոնը պատժամիջոցների ցանկում ներառել է «Յանդեքս Բանկը», «WB банк»-ը, «Ռոսգոսստրախը» և Ռուսաստանի ստվերային նավատորմի 27 նավ, այդ թվում՝ հեղուկ բնական գազ տեղափոխող չորս լցանավ։

Լոնդոնը նաև 210 միլիոն ֆունտ սթերլինգ կտրամադրի ուկրաինական պետական ​​«Էներգոատոմ» ընկերությանը բրիտանական միջուկային վառելիքի մատակարարման համար: Ուկրաինական ատոմակայանների վառելիքը կմատակարարի Urenco-ն հաջորդ երկու տարիների ընթացքում։

Մեծ Բրիտանիայի կառավարությունը հայտարարել է, որ համաձայնագիրը պետք է օգնի Ուկրաինային գոյատևել առաջիկա ձմեռների ընթացքում և նվազեցնել նրա խոցելիությունը Ռուսաստանի կողմից էներգետիկ ենթակառուցվածքների վրա հարձակումների նկատմամբ: Ուկրաինայի էլեկտրաէներգիայի կեսից ավելին արտադրվում է ատոմակայաններում:

Թարգմանությունը՝ Էմմա Չոբանյանի