Արաղչին հայտարարել է, որ ԱՄՆ-ի հետ վերջնական համաձայնագրի շուրջ բանակցությունները կսկսվեն ուրբաթ

Իրանը և ԱՄՆ-ն ուրբաթ Շվեյցարիայում կսկսեն բանակցությունների նոր փուլ՝ ժամանակավոր համաձայնագրի պաշտոնական մեկնարկից հետո վերջնական համաձայնագրի հասնելու համար։ Այս մասին հայտարարել է Իրանի արտաքին գործերի նախարար Աբբաս Արաղչին, գրում է Al Arabiya-ն։

«Հավանաբար ուրբաթ, դեռևս որոշվող վայրում, կսկսվի Իրանի և Միացյալ Նահանգների միջև բանակցությունների նոր փուլ՝ վերջնական համաձայնության հասնելու համար»,- ասել է Արաղչին։

Նա, միաժամանակ, զգուշացրել է, որ Իսրայելի կողմից Լիբանանի վրա ցանկացած հարձակում կամ Լիբանանի տարածքում շարունակական իսրայելական ներկայություն կհամարվի Միացյալ Նահանգների հետ ժամանակավոր համաձայնագրի խախտում։

«Մեր կարծիքով, այս հուշագրի կողմերն են՝ մի կողմից Միացյալ Նահանգներն ու Իսրայելը, մյուս կողմից՝ Իրանն ու «Հըզբոլլահ»-ը։ Սա, թերևս, հուշագրում ամենակարևոր հարցն է՝ պատերազմի անհապաղ և մշտական ​​​​դադարեցման հռչակումը բոլոր ճակատներում, այդ թվում՝ Լիբանանում»,- ասել է նա։

Հավելենք, որ Իրանի գլխավոր բանակցող, խորհրդարանի նախագահ Մոհամմադ Բաղեր Ղալիբաֆը կմասնակցի Շվեյցարիայում ԱՄՆ-ի հետ պատերազմն ավարտող համաձայնագրի ստորագրմանը։ Այս մասին հայտնել է Իրանի փոխարտգործնախարարը։

«Ստորագրման վայրը կլինի Շվեյցարիան, սակայն հստակ վայրը դեռևս որոշված ​​չէ։ Բանակցությունների հաջորդ փուլը կսկսվի ստորագրումից անմիջապես հետո»,- պետական ​​հեռուստատեսության հաղորդմամբ ասել է Մաջիդ Թախտ-Ռավանչին։

Վաշինգտոնը կներկայացնի ԱՄՆ փոխնախագահ Ջեյ Դի Վենսը, իսկ «Իրանը՝ Ղալիբաֆը», հավելել է Թախտ-Ռավանչին։

Թարգմանությունը՝ Էմմա Չոբանյանի