28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Լեհաստանում սպանվել է ռուս նկարիչ, քաղաքական էմիգրանտ Սեմյոն Սկրեպեցկին
Քաղաքականություն
16.06.2026 | 12:31
Լեհաստանի Բյալա Պոդլյասկա քաղաքում կրակոցների հետևանքով սպանվել է 44-ամյա ռուս նկարիչ և ծաղրանկարիչ, քաղաքական էմիգրանտ Սեմյոն Սկրեպեցկին (իսկական անունը՝ Ռոբերտ Կուզովկով), հայտնում է Podlaski.info-ն։ Կրակոցները հնչել են հունիսի 15-ին առավոտյան ժամը 10:00-ի սահմաններում, առևտրի տաղավարների մոտ գտնվող կայանատեղիում, գրում է The Insider-ը։
DzikMedia-ն հաղորդում է, որ կասկածյալներին հանցագործության վայր է բերել Բելառուսից տաքսու վարորդը, որին սպառնացել են զենքով: Կրակոցներից հետո նա փորձել է թաքնվել Բյալա Պոդլասկայում գտնվող Բելառուսի հյուպատոսությունում: Տեսախցիկներն արձանագրել են այդ պահը։ Biała News-ի փոխանցմամբ՝ քննիչները դիտարկում են վարկածը, որ սպանությանը մի քանի մարդ է ներգրավված եղել:
Հունիսի 12-ին՝ սպանությունից երեք օր առաջ, Սկրեպեցկին բողոքի ցույց էր կազմակերպել Բեռլինում Ռուսաստանի դեսպանատան դիմաց, որի ընթացքում նա տաբատի հետևի ճեղքից հանել էր Ռուսաստանի դրոշը և նետել աղբամանը։ Այնուհետև նկարիչը քայլել էր դեսպանատան մոտով՝ ձեռքին Ստալինին պատկերող նկար, գրկում՝ «մանուկ» Պուտինը։
Սպանությունից շուրջ մեկ ժամ առաջ նկարիչն իր տելեգրամյան ալիքում գրել էր, որ բողոքի ցույցը «շատ է դուր եկել ռուս հայրենասերներին», և որ ինքը «բռնաբարության սպառնալիքներ է ստացել»։
Սեմյոն Սկրեպեցկին նկարիչ, բլոգեր և քաղաքական էմիգրանտ է Ռուսաստանից։ Նա Լեհաստան է տեղափոխվել 2021 թվականին։ Իր աշխատանքներում և հրապարակային ելույթներում Սկրեպեցկին ծաղրում էր ՌԴ նախագահ Վլադիմիր Պուտինին, Ռուսաստանի կառավարությանը և Ուկրաինայի դեմ պատերազմը, նաև մասնակցել է բելառուսական բողոքի ցույցերին։
Թարգմանությունը՝ Էմմա Չոբանյանի
