13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
«Դեկտեմբերի 9-ին ուղղակի պետք է թաղել մեռելներին». Արման Բաբաջանյան
Քաղաքականություն
27.11.2018 | 20:37
Դեկտեմբերի 9-ին ուղղակի պետք է թաղել մեռելներին: Այսօր՝ նոյեմբերի 27-ին, Ջերմուկում ընտրողների հետ հանդիպման ժամանակ այս մասին ասաց «Լուսավոր Հայաստան» կուսակցությունից պատգամավորի թեկնածու Արման Բաբաջանյանը:
«Կասկած չունեմ, որ դեկտեմբերի 9-ին ջերմուկցին ընտրելու է լուսավորը, ընտրելու է Հայաստանի լուսավոր ապագան և մերժելու է բոլոր նրանց, ում ուղղակի պետք է թաղել, որովհետև ի՞նչ են անում մեռելներին, եթե ոչ հուղարկավորում են, եթե ոչ թաղում»,- ասաց նա:
Թեկնածուի խոսքով՝ իշխանության հարցը, մեծ հաշվով, լուծված է, իսկ «Լուսավոր Հայաստան»-ը գալիս է՝ լրացնելու այն ուժերի կազմը, որոնք լինելու են իշխանությունից դուրս: «Մենք գալիս ենք՝ մեր պրոֆեսիոնալ թիմով փոխլրացնելու, զսպելու, հավասարակշռելու իշխանությանը: Մենք գալիս ենք՝ ասելու, որ նորը, վաղը, ապագան այլընտրանք չունի՝ ի տարբերություն ուժերի, որոնք հասցրել են դրսևորվել և՛ որպես ընդդիմություն, և՛ որպես իշխանություն, և պատասխանատու են մեր երկրի այս ապականված իրականության համար: Եվ այդ ուժերն այսօր քննադատաբար հանդես են գալիս և՛ գործող իշխանության, և՛ նաև մեր դեմ, որովհետև մենք մեր կարևոր ներկայությամբ մերժում ենք և ասում, որ նրանք տեղ չունեն մեր իրականության մեջ, որովհետև թալանով, հարստահարելով 20-25 տարի ապականել են մեր երկիրն ու այսօր էլ փորձում են տեղ ունենալ իշխանության մեջ, խորհրդարանում և թույլ չտալ, որպեսզի տեղի ունեցած փոփոխությունները կյանքի կոչվեն և դառնան անշրջելի»,- հայտարարեց Արման Բաբաջանյանը:
Նա նաև կարծում է, որ Հայաստանում տեղի ունեցած փոփոխություններն արագ արդյունավորման անհրաժեշտություն ունեն. «Բոլորդ սպասում եք շատ արագ արդյունքների, ձեր կյանքում փոփոխությունների, և դրանք կարող եք ձեր կյանքում զգալ, եթե մեր պրոֆեսիոնալ թիմին պատվիրակեք՝ գնալ խորհրդարան և ներկայացնել ձեզ, բարձրաձայնել ձեր խնդիրները և դրանց կոնկրետ լուծումներ տալ»:
