Իրանի վերականգնման 300 մլրդ դոլարի ծրագիր, սառեցված միջոցների ազատում. ինչ է ենթադրում ԱՄՆ-Իրան 14 կետանոց հուշագիրը՝ Թեհրանի ներկայացմամբ

Իրանական «Մեհր» լրատվական գործակալությունը Իրան-ԱՄՆ փոխըմբռնման հուշագրի 14 կետից բաղկացած նախագծի նոր մանրամասներն է հրապարակել իրանական բանակցային թիմին մոտ կանգնած աղբյուրի վկայակոչելով։

Նախագծի մանրամասները, ըստ իրանական կողմի, հետևյալն են.

1․ Ռազմական գործողությունների մշտական ​​և անհապաղ դադարեցում բոլոր ճակատներում, այդ թվում՝ Լիբանանում։

2․ ԱՄՆ-ի հանձնառությունը Իրանի ներքին գործերին չմիջամտելու և Իրանի Իսլամական Հանրապետության ինքնիշխանությունը հարգելու հարցում։

3․ Ծովային շրջափակման լիակատար վերացում 30 օրվա ընթացքում։

4․ ԱՄՆ-ի հանձնառությունը՝ իր ուժերը դուրս բերել Իրանի հետ սահմանային տարածքներից։

5․ Հորմուզի նեղուցի վերաբացում 30 օրվա ընթացքում՝ իրանական պայմանավորվածություններով։

6․ Նավթի, նավթաքիմիական արտադրանքի և դրանց ածանցյալների վաճառքի նկատմամբ սահմանված պատժամիջոցների կասեցում և Իրանի ֆինանսական ռեսուրսներին լիակատար հասանելիություն։

7․ ԱՄՆ-ի և նրա դաշնակիցների կողմից Իրանի համար առնվազն 300 միլիարդ դոլարի վերակառուցման ծրագրերի ներկայացման անհրաժեշտություն։

8․ 60-օրյա բանակցություններ՝ միջուկային հարցերի հիման վրա վերջնական համաձայնության հասնելու և ԱՄՆ-ի առաջնային, երկրորդային պատժամիջոցների, ՄԱԿ-ի Անվտանգության խորհրդի և Միջազգային ատոմային էներգիայի գործակալության կառավարիչների խորհրդի բանաձևերի լիակատար վերացման համար։

9․ Իրանի կողմից միջուկային զենք չստեղծելու մասին համաձայնագրում ստանձնած պարտավորության վերահաստատումը։

10․ Բանակցությունների ընթացքում ԱՄՆ-ը պարտավորվում է չավելացնել իր ուժերը տարածաշրջանում և նոր պատժամիջոցներ չկիրառել։

11․ Վերջնական բանակցությունների 60-օրյա ժամկետի ընթացքում Իրանի արգելափակված 24 միլիարդ դոլարի ազատում։ Այս գումարի կեսը պետք է հասանելի լինի Իրանին բանակցությունների մեկնարկից առաջ։

12․ Համաձայնագրի իրականացման մոնիթորինգի մեխանիզմի ստեղծում։

13․ Վերջնական համաձայնագրի հաստատում ՄԱԿ-ի Անվտանգության խորհրդի բանաձևով։

14․ Վերջնական բանակցությունները չեն սկսվի՝ մինչև Իրանի սառեցված միջոցների կեսի ազատումը, Իրանի նավթային պատժամիջոցների կասեցումը և ռազմածովային շրջափակման վերացումը։

Նշվում է, թե վերջնական համաձայնագիրը կկազմվի բացառապես հարստացված նյութերի և հարստացման ճակատագրի, պատժամիջոցների վերացման և Իրանի տնտեսական վերակառուցման ծրագրի վերաբերյալ։ Իրանի հրթիռային ծրագրի և դիմադրության խմբերին աջակցության վերաբերյալ քննարկումները վերջնականապես հանվել են օրակարգից։

Իրանի ԱԳՆխոսնակ Էսմայիլ Բաղային հայտարարել է, որ այս տեքստը դեռևս պետք է վերանայվի և վերջնականապես մշակվի Իրանի համապատասխան հաստատությունների կողմից։

Հավելենք, որ ԱՄՆ-ն դեռ չի հաստատել այս կամ մեկնաբանել այս  պայմանները։

Թարգմանությունը՝ Էմմա Չոբանյանի