Ընդդիմությունը դուրս կգա՞ փողոցային պայքարի․ քաղաքապետարանը հավաքների մասին իրազեկումներ չի ստացել

Փողոցային պայքար և բողոքի ակցիաներ կլինե՞ն հետընտրական Հայաստանում, այս պահին ընդդիմադիր քաղաքական ուժերը չեն հստակեցնում։ Երևանի քաղաքապետարանի պաշտոնական կայքում հավաքներ և երթեր անցկացնելու մասին դիմումներ ևս չկան։

Ժողովներ, հանրահավաքներ, երթեր և ցույցեր անցկացնելու մասին ՀՀ օրենքի 10-րդ հոդվածը սահմանում է. «Կազմակերպիչները զանգվածային հրապարակային միջոցառումներ անցկացնելու մասին գրավոր իրազեկում են զանգվածային հրապարակային միջոցառման անցկացման վայրի համայնքի ղեկավարին, Երևանում` Երևանի քաղաքապետին: Իրազեկումը համարվում է օրինական և քննարկման ենթակա, եթե ներկայացված է միջոցառումն անցկացնելու նախատեսված օրվանից ոչ ուշ, քան հինգ աշխատանքային օր առաջ, և ոչ շուտ, քան քսան օր առաջ: Եթե զանգվածային հրապարակային միջոցառումն անցկացվելու է երթի ձևով, ապա պետք է իրազեկվեն երթի անցկացման բոլոր տարածքների լիազոր մարմինները»։

Հունիսի 7-ի ընտրությունների նախնական արդյունքներով խորհրդարան կանցնի 3 ուժ` 2 դաշինք, 1 կուսակցություն. «Քաղաքացիական պայմանագիր» կուսակցությունը՝ 49,8 %, «Ուժեղ Հայաստան» դաշինքը՝ 23,28% և «Հայաստան»  դաշինքը 9,93%-ով։ Դեռևս հարցական է՝ ԲՀԿ-ն կկարողանա՞ վերահաշվարկի արդյունքում  ապահովել այս  պահին պակասող 0,004 տոկոս ձայնը. նախնական տվյալներով՝ Ծառուկյանի ղեկավարած ուժը ստացել է 3,996 տոկոս ձայն. անցողիկ շեմը կուսակցության դեպքում 4 տոկոսն է։

Քաղաքական ուժերից մի քանիսը չեն ընդունում ընտրական արդյունքները և դիմել են վերահաշվարկի համար, «Հայաստան» դաշինքը հայտարարել է, որ արդյունքները վիճարկելու է Սահմանադրական դատարանում, իսկ «Ուժեղ Հայաստան» կուսակցությունը սպասում է վերահաշվարկի վերջնական արդյունքներին։

«Վերահաշվարկի արդյունքում կիմանաք՝ «Բարգավաճ Հայաստան» կուսակցությունն Ազգային ժողով մտնում է, թե չէ: Կհասկանանք՝ Ազգային ժողովում հնարավորություն կունենա գլխավոր դատախազ և այլ պաշտոնյաներ ընտրելու ժամանակ ընդդիմությունն իր խոսքն ասի, որից հետո պարզ կլինի ԱԺ-ը կունենա գործիքակազմ դեմ կանգնելու ապօրինություններին, քանի որ այս անգամ իշխանությունը շատ մանդատներ է կորցրել: ԲՀԿ-ի տարբերակին ենք սպասում, որից հետո հանդես կգանք հայտարարությամբ»,- օրեր առաջ ասել է կուսակցության ցուցակի առաջին համար Նարեկ Կարապետյանը։

Խորհրդարանական ընտրությունների քվեարկության վերջնարդյունքները կհրապարակվեն հունիսի 14-ին, ինչից հետո թերևս պարզ կդառնա՝ փողոցային պայքար կլինի՞, թե՞ ոչ։

Ռոզա Վարդանյան