03.07.2026 | 01:00
ԱԱ-2026. Իսպանիան վստահ հաղթեց և 1/8 եզրափակիչում է. ՏԵՍԱՆՅՈՒԹ
ԵՄ պատժամիջոցների նոր փաթեթում են պատրիարք Կիրիլը և ՖԻԴԵ-ի նախագահ Արկադի Դվորկովիչը
Քաղաքականություն
10.06.2026 | 18:29
Հունգարիայի նախկին վարչապետ Վիկտոր Օրբանի՝ իշխանությունը և Ռուսաստանի դեմ ԵՄ պատժամիջոցները կասեցնելու հնարավորությունը կորցնելուց հետո Բրյուսելը որոշել է արագ գործել՝ ՌԴ նախագահ Վլադիմիր Պուտինի ռեժիմի երկու բարձրաստիճան անդամների նկատմամբ վիզային արգելքներ սահմանելով և սառեցնելով ակտիվնեը։ EUobserver-ի փոխանցմամբ՝ Եվրոպական հանձնաժողովն առաջարկել է Համայն Ռուսիո պատրիարք Կիրիլին և ՖԻԴԵ-ի նախագահ Արկադի Դվորկովիչին ներառել պատժամիջոցների 21-րդ փաթեթում, գրում է The Moscow Times-ը։
Օրբանը նախկինում հրաժարվել էր աջակցել նրանց դեմ պատժամիջոցներին: Այժմ Եվրահանձնաժողովը պնդում է, որ Վլադիմիր Գունդյաևը (Ռուս ուղղափառ եկեղեցու ղեկավարը) պետք է սև ցուցակում լինի, քանի որ «նա հետևողականորեն արդարացրել և աջակցել է Ռուսաստանի նվաճողական պատերազմն Ուկրաինայի դեմ»: Իր հերթին, Դվորկովիչը «հրապարակայնորեն աջակցել է» այս պատերազմին: Ավելին, նա կապված է Ռուսաստանի շախմատի ֆեդերացիայի հետ, որն իր գործողություններով օրինականացրել է Ուկրաինայի տարածքի բռնազավթումը՝ այնտեղ շախմատի մրցաշարեր անցկացնելով, նշում է Եվրահանձնաժողովը:
Դվորկովիչը 2007-2009 թվականներին զբաղեցրել է Շախմատի ֆեդերացիայի առաջին փոխնախագահի պաշտոնը, այնուհետև մինչև 2014 թվականը նախագահել է ֆեդերացիայի վերահսկիչ խորհուրդը: Հինգ օր առաջ ֆեդերացիան նրան վերստին առաջադրել է որպես ՖԻԴԵ-ի նախագահի թեկնածու սեպտեմբերին Սամարղանդում կայանալիք ընտրություններում։
Սպորտային ևս մի քանի պաշտոնյաներ կարող են ենթարկվել պատժամիջոցների: Եվրահանձնաժողովի ցուցակում են սպորտի նախարար Միխայիլ Դեգտյարյովը, Ռուսաստանի ըմբշամարտի ֆեդերացիայի նախագահ Միխայիլ Մամիաշվիլին և Ստանիսլավ Պոզդնյակովը, որը մինչև 2024 թվականը գլխավորել է Ռուսաստանի օլիմպիական կոմիտեն: Պատժամիջոցներ կիրառելու առաջարկը պայմանավորված է նրանց պատերազմամետ հայացքներով:
Անձնական պատժամիջոցների վերաբերյալ Եվրահանձնաժողովի նախագահ Ուրսուլա ֆոն դեր Լեյենը նախօրեին հայտարարել էր բանկերի և ֆինանսական ընկերությունների համար սահմանափակող միջոցառումների խոշոր փաթեթի պատրաստման, ինչպես նաև ռուսական նավթի գնի շեմը մինչև հունվար սառեցնելու, Ռուսաստանին հեղուկ բնական գազի լցանավերի վաճառքն արգելելու և ձկնորսության ոլորտի դեմ առաջին անգամ պատժամիջոցներ կիրառելու առաջարկների մասին։
Պատժամիջոցների փաթեթը պետք է միաձայն հաստատվի ԵՄ առաջնորդների կողմից։
Թարգմանությունը՝ Էմմա Չոբանյանի
