16.08.2026 | 15:48
Համաշխարհային օվկիանոսի ջերմաստիճանը հասել է 2026 թվականի սկբից առավելագույն արժեքին․ Լևոն Ազիզյան
Ամփոփվել են տնային կալանքի տակ գտնվող անձանց ընտրական իրավունքի ապահովման արդյունքները
Քաղաքականություն
08.06.2026 | 22:24
Արդարադատության նախարարության Պրոբացիայի ծառայությունը հայտնել է, որ հունիսի 7-ի դրությամբ տնային կալանքի տակ գտնվող և ընտրելու իրավունք ունեցող 869 քաղաքացիներից 398-ը մասնակցել են Ազգային ժողովի ընտրություններին։ Գերատեսչության տվյալներով՝ ընտրությանը մասնակցելու ցանկություն հայտնած բոլոր քաղաքացիների համար ապահովվել են անհրաժեշտ պայմանները՝ ընտրական իրավունքի լիարժեք իրացման նպատակով։
«2026 թվականի հունիսի 7-ի դրությամբ Պրոբացիայի ծառայությունում տնային կալանք խափանման միջոցով հաշվառված անձանց թիվը կազմել է 922 անձ, որոնցից, սակայն, միայն 869-ն են ունեցել ընտրելու իրավունք։
Վերջիններիս ընտրական իրավունքի անարգել իրականացումն ապահովելու և աշխատանքների պատշաճ կազմակերպման նպատակով ծանուցվել է վերոնշյալ բոլոր անձանց՝ ընտրությանը մասնակցելու ցանկություն ունեցողների քանակը պարզելու համար, որոնցից, ըստ նախնական հարցումների, 319-ը հրաժարվել են ընտրությանը մասնակցելուց:
ՆԳՆ-ի հետ համագործակցության արդյունքում կազմակերպվել և իրականացվել է թվով 47 անձանց ընտրատեղամասերի փոփոխություն, ապահովվել է թվով 43 անձանց հաշվառում և ընտրողների ռեգիստրում ներառում, թվով 9 անձանց անձնագրին փոխարինող Ձև 9 տեղեկանքի ստացում՝ անձնագիր չունենալու հանգամանքով պայմանավորված, բացի այդ թվով 89 անձանց անձը հաստատող փաստաթղթեր ստացվել են վարույթ իրականացնող և պետական այլ մարմիններից։
2026 թվականի հունիսի 7-ի դրությամբ փաստացի ցանկություն են հայտնել և ընտրությանը մասնակցել են տնային կալանքի տակ գտնվող թվով 398 քաղաքացիներ՝ ՀՀ ամբողջ տարածքում:
Այսպիսով, Արդարադատության նախարարության Պրոբացիայի ծառայության կատարած աշխատանքի արդյունքում տնային կալանքի տակ գտնվող, ընտրությանը մասնակցելու ցանկություն հայտնած բոլոր քաղաքացիները ևս իրացրել են իրենց ընտրելու իրավունքը»,- ասվում է հաղորդագրությունում:
