28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Բաքվի դատախազը պահանջել է Toplum TV-ի լրագրողներին դատապարտել 13-16 տարվա ազատազրկման
Քաղաքականություն
08.06.2026 | 21:33
Հունիսի 8-ին Բաքվի ծանր հանցագործությունների դատարանն ավարտել է Toplum TV-ի լրագրողների գործով դատավարությունը։ Դատավոր Ազեր Տագիևի նախագահությամբ կայացած նիստում դատախազը մեղադրյալների համար պահանջել է 13-ից 16 տարի ժամկետով ազատազրկում, գրում են ադրբեջանական լրավամիջոցները։
Դատախազը 16 տարվա ազատազրկում է պահանջել «Երրորդ հանրապետական պլատֆորմի» խոսնակ Ակիֆ Գուրբանովի և կազմակերպության հիմնադիր խորհրդի անդամ Ռուսլան Իզեթլիի համար, 15 տարվա ազատազրկում՝ Toplum TV հեռուստաընկերության համահիմնադիր Ալեսկեր Մամեդլիի և «Ժողովրդավարական նախաձեռնությունների ինստիտուտի» աշխատակից Ալի Զեյնալովի համար։
Բացի այդ, 14 տարվա ազատազրկում է պահանջվել Ռամիլա Բաբաևայի, Իլկինա Ամրախովի և Մուշֆիգ Ջաբարովայի, 13 տարվա ազատազրկում՝ Ֆարիդա Իսմայիլովայի և Էլմիրա Աբբասովայի համար։
Պետական մեղադրողը նաև պահանջել է, որ մեղադրյալները մինչև 3 տարի ժամկետով զրկվեն որոշակի պաշտոններ զբաղեցնելու իրավունքից ու բռնագրավի կալանքի տակ գտնվող նրանց գույքը։
Մեղադրողը նաև դատարանի դահլիճում խնդրել է ձերբակալել լրագրող Էլմիրա Աբբասովային։ Նա այժմ ոստիկանության հսկողության տակ է։
Հաջորդ դատական նիստը նշանակված է հունիսի 22-ին։
Նշենք, որ լրատվամիջոցի դեմ գործը սկսվել է 2024 թվականի մարտի 6-ին: Այդ օրն իրավապահ մարմինները խուզարկություններ էին իրականացրել անկախ լրատվամիջոցի, «Ժողովրդավարական նախաձեռնությունների ինստիտուտի» և «Երրորդ հանրապետության հարթակի» գրասենյակներում, ինչպես նաև մի քանի աշխատակիցների և ակտիվիստների տներում։
Խուզարկություններից հետո քրեական գործեր են հարուցվել լրագրողներ և հասարակական ակտիվիստներ Ֆարիդ Իսմայիլովի, Էլմիրա Աբբասովայի, Մուշֆիգ Ջաբարի, Ակիֆ Գուրբանովի, Ալի Զեյնալի, Ռամիլ Բաբաևի և Իլքին Էմրահովի դեմ՝ մաքսանենգության մեղադրանքով: Նրանցից մի քանիսը կալանավորվել են։
Գործով մեղադրյալները հերքում են առաջադրված մեղադրանքները և պնդում, որ քրեական հետապնդումը քաղաքական դրդապատճառներ ունի: Toplum TV-ի ղեկավարությունն ու անձնակազմը կարծում են, որ շարունակվող հետապնդումը ճնշում է անկախ լրատվամիջոցների նկատմամբ և Ադրբեջանում խոսքի ազատությունը սահմանափակելու փորձ:
Toplum TV-ի գործը ծավալվում է անկախ լրագրողների նկատմամբ հետապնդումների ավելի լայն ալիքի ֆոնին: 2023 թվականի նոյեմբերից ի վեր Ադրբեջանում ձերբակալվել է լրատվամիջոցների շուրջ 30 ներկայացուցիչ, որոնցից շատերը կապված են Meydan TV, Abzas Media և այլ անկախ լրատվամիջոցների հետ։
Թարգմանությունը՝ Էմմա Չոբանյանի
