Չինաստանը «հատուկ ծովային գործողություն» է սկսել Թայվանի արևելյան ափերի մոտ

Չինաստանը հայտարարել է Թայվանի արևելյան ափին «հատուկ ծովային գործողության» մեկնարկի մասին՝ ի պատասխան Ճապոնիայի և Ֆիլիպինների միջև այս տարածքում ծովային սահմանազատման բանակցությունների։ Պեկինը սա դիտարկում է իր տարածքային ինքնիշխանության և ծովային իրավունքների խախտում: Չինաստանը հավակնում է բոլոր հարակից ջրերի զգալի տարածքներին և վիճաբանության մեջ է ինչպես Ճապոնիայի, այնպես էլ Ֆիլիպինների հետ, գրում է Current time-ը։

Սինհուա գործակալության տվյալներով՝ «հատուկ գործողության» նպատակն է՝ «իրականացնել Չինաստանի վարչական և իրավապահ իրավասությունը ծովում, ամրապնդել նրա պարեկային և իրավապահ կարողությունները հեռավոր ծովային տարածքներում և կարգավորել երթևեկությունը կարևոր ջրերում, ապահովել ծովային անվտանգությունը և պաշտպանել ազգային իրավունքներն ու շահերը»։

Ճապոնիան և Ֆիլիպինները հայտարարել են Թայվանից արևելք գտնվող բացառիկ տնտեսական գոտու և մայրցամաքային շելֆի սահմանազատման գործընթացի մեկնարկի մասին վերջերս Ֆիլիպինների նախագահ Ֆերդինանդ Մարկոս ​​կրտսերի՝ Ճապոնիա կատարած այցի ժամանակ։

Չինաստանի արտաքին գործերի նախարարությունը Ճապոնիային և Ֆիլիպիններին մեղադրել է ծովային իրավունքի մասին ՄԱԿ-ի կոնվենցիան խախտելու մեջ: Թայվանի հարցերով Չինաստանի խորհուրդը հայտարարել է, որ ջրերը, որտեղ գտնվում է վիճելի ծովային սահմանը, կղզու մոտ են։

Ի պատասխան՝ Թայվանի առափնյա պահպանության ծառայությունը հայտարարել է, որ Չինաստանն ինքնիշխան իրավունք չունի իր արևելյան ջրերում: Թայվանի իշխանությունները հինգ նավ և պարեկային նավակ են ուղարկել չինական ուժերին հետևելու համար: Թայվանի ուժերը հայտնել են, որ հաջողությամբ հետևել են Սյամենից մեկնած և Թայվանի հարավարևմտյան ջրեր ուղղություն վերցրած չինական նավերի տեղաշարժերին։

Պեկինը Թայվանը համարում է իր տարածքի մի մասը և դեմ է այլ երկրների ու Թայվանի իշխանությունների միջև պաշտոնական շփումներին: Թայվանի իշխանությունները, իրենց հերթին, մերժում են Չինաստանի առաջարկած «մեկ երկիր, երկու համակարգ» մոդելը, որը Պեկինն օգտագործում է՝ որպես հնարավոր միավորման հիմք։

Ճապոնիան և Ֆիլիպինները Չինաստանի աճող ազդեցությունը Թայվանի շուրջ համարում են անվտանգության ռիսկ։

Թարգմանությունը՝ Էմմա Չոբանյանի