Բոլորիդ կպառկեցնենք ասֆալտներին, ի՞նչ Հանրապետական, ի՞նչ աֆտարիտետ, պատերով կտանք. Նիկոլ Փաշինյան. ՏԵՍԱՆՅՈՒԹ

Ինչպես արդեն տեղեկացրել ենք, «Իմ քայլը» դաշինքն այսօր քարոզարշավը շարունակում է Լոռու մարզում: Առաջին քաղաքը, որտեղ այցելեց վարչապետի պաշտոնակատար Նիկոլ Փաշինյանն իր թիմակիցների հետ Սպիտակն էր: Թեև հավաքվածներն ակնկալում էին լսել նաև աղետի գոտում առկա խնդիրների լուծման մասին, վարչապետի պաշտոնակատարն, այդուհանդերձ իր ելույթը կառուցեց հիմնականում Հանրապետական կուսակցությանը հակադարձելով և ընդհանուր կառավարության ծրագրերը ներկայացնելով:

Փաշինյանը հայտարարեց, որ իրենց գլխավոր խնդիրներից մեկը երկրում աղքատության վերացումն է:

«Մենք աղքատության հաղթահարումը չենք պատկերացնում բրինձ և մուրաբա բաժանելով, մենք դա տեսնում ենք աշխատատեղերի, գործարանների ստեղծման միջոցով: Այս ընթացքում, երբ ճանապարհներին էինք, ինձ մոտեցել են գործարարներ և ասել, որ իրենք պատրաստվում են ներդրումներ անել, գործարաններ բացել: Այժմ բազմաթիվ ներդրումային ծրագրեր են քննարկվում»,- ներկաներին տեղեկացրեց վարչապետի պաշտոնակատարը:
Բացի այդ, խոստացավ գյուղացիներին հուզող մի շարք խնդիրների լուծում տալ, լուծել ոռոգման ջրերի, հակակարկտային կայանների հարցերը, մատչելի վարկային միջոցներ տրամադրել գյուղացիներին, մթերքների արտահանման համար պայմաններ ստեղծել և այլն:

Ապա վարչապետի պաշտոնակատարն անդրադարձավ ՀՀԿ-ական գյուղապետների կողմից մարդկանց վախեցնելու մասին շշուկներին՝ զգուշացնելով, որ անձամբ է գնալու այդ գյուղապետների հետևից: «Վզներիցդ բռնած դուրս եմ շպրտելու ձեր կաբինետներից, էս երկրում մարդ կա՞, որը համարձակվում է քաղաքացուն վախեցնե՞լ: Բոլորիդ կպառկեցնենք ասֆալտներին, էս ովքե՞ր են սրանք, ի՞նչ Հանրապետական, ի՞նչ օլիգարխ, ի՞նչ հաստավիզ, բոլորիդ կպառկեցնենք ասֆալտներին ու տարիներով վեր չեք կենա էդ ասֆալտների վրայից: Ես ոստիկանությանն ասում եմ՝ չփորձի մի հանցավոր տարր թպրտալ, պատերով կտանք»,- հարթակից հայտարարեց Նիկոլ Փաշինյանը:

Մանրամասները՝ տեսանյութում: